16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
ԱՄՆ-ն Ուկրաինայի համար նախատեսված հրթիռների բաղադրիչները փոխանցում է Մերձավոր Արևելքում գտնվող իր զորքերին․ WSJ
Քաղաքականություն
05.06.2025 | 13:55
ԱՄՆ նախագահ Դոնալդ Թրամփի վարչակազմն Ուկրաինայի համար նախատեսված անօդաչու թռչող սարքերի դեմ պայքարի հիմնական տեխնոլոգիաները վերահասցեագրում է ամերիկյան զինված ուժերին։ Այս մասին գրել է Wall Street Journal-ը, որին վկայակոչում է BBC-ի ռուսական ծառայությունը։
Լրատվամիջոցի տվյալներով՝ անցյալ շաբաթ Պենտագոնը ոչ հանրային կերպով տեղեկացրել է Կոնգրեսին, որ Մերձավոր Արևելքում գտնվող ԱՄՆ ռազմաօդային ուժերի ստորաբաժանումներին այժմ հատկացվում են հրթիռների համար նախատեսված հատուկ պայթուցիչներ, որոնք Ուկրաինան օգտագործում է ռուսական անօդաչու թռչող սարքերը խոցելու համար։
Այս քայլը տեղի է ունեցել ԱՄՆ նախագահ Դոնալդ Թրամփի և Ռուսաստանի նախագահ Վլադիմիր Պուտինի միջև նախորդ օրը տեղի ունեցած զրույցի ֆոնին, նշում է WSJ-ն։ Թրամփը նշել էր՝ Պուտինն իրեն ասել է, որ Մոսկվան պետք է վճռականորեն արձագանքի Ուկրաինայի կողմից ռուսական ռազմավարական օդանավակայանների վրա հարձակումներին։
Նախօրեին նաև հայտնի էր դարձել, որ Պենտագոնի ղեկավար Փիթ Հեգսեթն առաջին անգամ չի մասնակցի «Ռամշտայնի» ձևաչափով հանդիպմանը (նույնիսկ առցանց ձևաչափով), որտեղ քննարկվում է Կիևին ռազմական օգնության հատկացումը։
Միացյալ Նահանգներն Ուկրաինայի կարևոր դաշնակիցն է, այդ թվում՝ ռազմական օգնության առումով։ 2025 թվականի մարտին, նախագահ Ջո Բայդենի՝ պաշտոնից հեռանալուց և Դոնալդ Թրամփի կողմից պաշտոնը ստանձնելուց հետո, Ուկրաինային տրամադրվող ռազմական օգնությունը կասեցվել էր։ Թրամփը շուտով վերսկսել էր զենքի մատակարարումը Ուկրաինային։
Այնուամենայնիվ, դեռևս անհայտ է՝ արդյո՞ք Միացյալ Նահանգները կպահպանի նույն մակարդակի ռազմական օգնությունը Թրամփի օրոք։
Թարգմանությունը՝ Էմմա Չոբանյանի
