Պենտագոնի ղեկավարն առաջին անգամ չի մասնակցի Ուկրաինայի դաշնակիցների «Ռամշտայնի» ձևաչափով հանդիպմանը

ԱՄՆ-ի կողմից երեք տարի առաջ Ուկրաինային ռազմական օգնությունը համակարգելու միջազգային խումբ ստեղծելուց ի վեր առաջին անգամ Պենտագոնի ղեկավար Փիթ Հեգսեթը չի մասնակցի ավելի քան 50 երկրների պաշտպանության նախարարների հանդիպմանը։ Այս մասին հայտնում է Associated Press-ը, որին վկայակոչում է BBC-ի ռուսական ծառայությունը։

Հեգսեթը, որը կիրակի վերադարձել է Սինգապուրում կայացած ազգային անվտանգության համաժողովից, Բրյուսել չի ժամանի մինչև չորեքշաբթի երեկո, պնդում է գործակալությունը։ Անանուն աղբյուրը հայտնել է, որ ԱՄՆ պաշտպանության նախարարը չի մասնակցի հանդիպմանը նաև տեսակապի միջոցով։

Լրատվամիջոցը գրում է, որ սա վերջինն է այն քայլերից, որոնք Վաշինգտոնը ձեռնարկել է Ուկրաինայում ռազմական գործողություններից հեռու մնալու համար։

Politico-ն ևս հայտնում է, որ Հեգսեթը չի մասնակցելու «Ռամշտայնի» ձևաչափով հանդիպմանը։

Պենտագոնի մամուլի խոսնակ Քինգսլի Ուիլսոնը հայտարարել է, որ Փիթ Հեգսեթը չի կարողանա մասնակցել Ուկրաինայի դաշնակիցների հանդիպմանը՝ այցերի ժամանակացույցի հետ կապված խնդիրների պատճառով։

«Միացյալ Նահանգները կենտրոնացած է Ուկրաինայում պատերազմը հնարավորինս շուտ ավարտելու ուղղությամբ՝ այնպիսի պայմաններով, որոնք կապահովեն երկարատև խաղաղություն»,- հավելել է նա։

Հեգսեթի նախորդը՝ Լլոյդ Օսթինը, «Ռամշտայնի» ձևաչափով խումբը ստեղծել էր Ուկրաինայում պատերազմի սկսվելուց հետո։ Այդ ժամանակից ի վեր ավելի քան 50 անդամ երկրներ միասին Կիևին տրամադրել են շուրջ 126 միլիարդ դոլարի ռազմական օգնություն, այդ թվում՝ ավելի քան 66,5 միլիարդ դոլար՝ Միացյալ Նահանգներից։

AP-ն գրում է, որ Հեգսեթը սկզբում հրաժարվել է ձևաչափի ղեկավարի դերից, իսկ այժմ ընդհանրապես հրաժարվել է հանդիպումից։

Թարգմանությունը՝ Էմմա Չոբանյանի