Պետք չի ինտրիգներ, միջանձնային հարցեր փնտրել․ Արփինե Սարգսյանը՝ Արամ Հովհաննիսյանի հրաժարականի մասին․ ՏԵՍԱՆՅՈՒԹ

«Որևէ պաշտոնյա հավերժ չէ, պետք չէ ինտրիգներ, միջանձնային հարցեր փնտրել»,- ԱԺ համատեղ հանձնաժողովների նիստում 2024 թվականի պետական բյուջեի կատարման նախնական քննարկումների ժամանակ այսպես արձագանքեց ՆԳ նախարար Արփինե Սարգսյանը՝ պատասխանելով ընդդիմադիր պատգմաավոր Գեղամ Մանուկյանի հարցին, թե ինչու է Արամ Հովհաննիսյանն ազատվել ոստիկնապետի պաշտոնից։

Ուժային կառույցի ղեկավարը պարզաբանեց, որ նախարարությունում իր նշանակումից հետո եղել են կադրային տարբեր փոփոխություններ։

«Կադրային փոփոխությունները օգնում են նոր հայացքով, նոր մոտեցմամբ նայել հարցերին, որոնց տարիներ շարունակ այլ հայացքով է նայվել։ Ոստիկանապետի փոփոխությունն այս տրամաբանության շրջանակներում է. կարիք կար կադրային փոփոխության, որը կօգներ ոստիկանության ոլորտի բարեփոխումներին ավելի թարմ աչքով նայելու, ավելի արդյունավետ մեթոդներով իրականացնելու և առաջ գնալու։ Սա է եղել Արամ Հովհաննիսյանի ազատման պատճառը»,-նշեց Սարգսյանը։

Հիշեցնենք, որ ՆԳ ոստիկանության պետ-ներքին գործերի նախարարի տեղակալ Արամ Հովհաննիսյանը երկու օր առաջ պաշտոնից ազատվեց։ Նույն օրը Փաշինյանի որոշմամբ մեկ այլ պաշտոնանկություն էլ եղավ․ Լոռու մարզպետ Արման Ղազարյանը հրաժարականի դիմում ներկայացրեց․ նա հաջորդ օրը Փաշինյանի որոշմամբ նշանակվեց ոստիկանության պետ։

Հավելենք, որ Արամ Հովհաննիսյանի պաշտոնանկության վերաբերյալ մի քանի վարկած է շրջանառվում՝ նրա անգործությունից մինչև որդիների հետ կապված աղմկահարույց դեպքեր։ Մասնավորապես, Մասիսի հաշվառման-քննական բաժնի պետի պաշտոնը զբաղեցնող Կարլեն Հովհաննիսյանի մասով նշում են, որ անմիջական կապ ունի կեղծ վարորդական վկայականներ տրամադրելու դեպքերի հետ։ Մյուս որդու՝ Հրաչյա Հովհաննիսյանի մասով էլ «Հետք»-ը գրել էր, որ զավթել է համայնքային հողը, տիրացել Ոստիկանության կայանատեղիին։
Factor TV-ի աղբյուրները հայտնում են, որ Փաշինյանը տևական ժամանակ այս մասին հարցեր է ուղղել Հովհաննիսյանին, միևնույն ժամանակ խնդիրներ են եղել նաև ՆԳՆ նախարար Արփինե Սարգսյանի հետ, ինչն էլ, ի վերջո, հանգեցրել է պաշտոնանկության։

Մանրամասները՝ տեսանյութում։

Մանյա Պողոսյան