18.12.2025 | 23:24
ՀՀ տարածքում ավտոճանապարհները հիմնականում անցանելի են
Թրամփը հայտարարել է՝ Պուտինը, հնարավոր է, միտումնավոր ձգձգում է բանակցությունները
Քաղաքականություն
29.05.2025 | 11:30
ԱՄՆ նախագահ Դոնալդ Թրամփը կասկածներ է հայտնել Ուկրաինայի պատերազմի պատճառով Ռուսաստանի նկատմամբ նոր պատժամիջոցներ սահմանելու վերաբերյալ՝ ասելով, որ չի ցանկանում, որ պատժամիջոցները խանգարեն հրադադարին, գրում է Reuters-ը։
«Եթե կարծում եմ, որ մոտ եմ համաձայնության, ապա չեմ ուզում դա անելով՝ փչացնել գործընթացը»,- լրագրողների հետ ճեպազրույցում ասել է Թրամփը։
Նա նաև ասել է, որ ՌԴ նախագահ Վլադիմիր Պուտինը, հնարավոր է, միտումնավոր ձգձգում է Ուկրաինայում հրադադարի վերաբերյալ բանակցությունները և հիասթափություն է հայտնել վերջերս ռուսական ռմբակոծությունների կապակցությամբ։
«Մենք կպարզենք՝ նա [Պուտինը] մեզ ինչ-որ բանի դրդո՞ւմ է, թե՞ ոչ, և եթե այդպես է, մենք մի փոքր այլ կերպ կարձագանքենք։ Ես ձեզ կտեղեկացնեմ մոտ երկու շաբաթից»,- ասել է ԱՄՆ նախագահը։
Թրամփը նաև հավելել է, որ անհրաժեշտության դեպքում կհանդիպի Ուկրաինայի նախագահ Վլադիմիր Զելենսկիի և ՌԴ նախագահ Վլադիմիր Պուտինի հետ։
Հիշեցնենք՝ The Wall Street Journal-ն օրերս հայտնել էր, որ Թրամփը դիտարկում է այս շաբաթ Ռուսաստանի նկատմամբ պատժամիջոցներ սահմանելու հնարավորությունը, քանի որ նա ավելի ու ավելի շատ է դժգոհ Ուկրաինայի վրա Ռուսաստանի հարձակումներից։
Politico-ն, իր հերթին, հաղորդել էր, որ Թրամփը կորցնում է համբերությունը ՌԴ նախագահ Վլադիմիր Պուտինի նկատմամբ, սակայն դեռևս որոշում չի կայացրել իր հաջորդ գործողությունների վերաբերյալ։
Նախօրեին Վլադիմիր Զելենսկին առաջարկել էր եռակողմ հանդիպում անցկացնել Վլադիմիր Պուտինի և Դոնալդ Թրամփի հետ։ Կրեմլի խոսմակ Դմիտրի Պեսկովը, մեկնաբանելով Զելենսկիի առաջարկը, հայտարարել էր, որ Ռուսաստանի և Ուկրաինայի նախագահների հանդիպումը «պետք է լինի երկու պատվիրակությունների միջև տարբեր ոլորտներում կոնկրետ համաձայնությունների արդյունք»։
Թարգմանությունը՝ Էմմա Չոբանյանի
