08.08.2026 | 13:46
Հրազդանում բացվել է Firebird AI ընկերության «ԱԲ գործարանը»
Թրամփի համբերությունը Պուտինի նկատմամբ սպառվում է, բայց նա դեռ չի որոշել հետագա քայլերը․ Politico
Քաղաքականություն
28.05.2025 | 15:33
ԱՄՆ նախագահ Դոնալդ Թրամփը կորցնում է համբերությունը Ռուսաստանի նախագահ Վլադիմիր Պուտինի նկատմամբ, սակայն դեռևս որոշում չի կայացրել իր հաջորդ գործողությունների վերաբերյալ։ Այս մասին գրում է Politico-ն, որին վկայակոչում է DW-ի ռուսական ծառայությունը։
«Պուտինը վտանգավոր կերպով մոտ է այրելու այն ոսկե կամուրջը, որը Թրամփը կառուցել է իր համար»,- լրատվամիջոցին ասել է ամերիկյան վարչակազմի անանուն պաշտոնյան։
Politico-ն հիշեցնում է վերջին օրերին Պուտինի մասին Թրամփի կոշտ հայտարարությունները՝ «լիովին խելագար» և «կրակի հետ խաղալու» վերաբերյալ։ Միևնույն ժամանակ, Սպիտակ տան ղեկավարը դեռևս չի որոշել՝ արդյո՞ք լրացուցիչ պատժամիջոցներ կկիրառի Մոսկվայի նկատմամբ՝ ի պատասխան Ռուսաստանի կողմից Ուկրաինայում ուժեղացված հարվածների։ Այս մասին Politico-ին ասել են չորս ամերիկացի պաշտոնյաներ։
Միևնույն ժամանակ, Դոնալդ Թրամփի պաշտոնավարման առաջին ժամկետի ընթացքում Ուկրաինայի հարցերով ԱՄՆ հատուկ ներկայացուցիչ Քուրթ Վոլքերը լուրջ կասկածներ է հայտնել, որ ԱՄՆ նախագահը երբևէ լայնածավալ պատժամիջոցներ կկիրառի Մոսկվայի դեմ:
«Նա շատ հնարավորություններ է ունեցել դա անելու, բայց միշտ խուսափել է դրանցից»,- նշել է նա։
Իր հերթին, Թրամփի վարչակազմի նախկին աշխատակիցների կողմից 2021 թվականին ստեղծված America First Policy Institute-ի փոխտնօրեն Ֆրեդ Ֆլիցը կարծում է, որ Վաշինգտոնը կարող է խստացնել Ռուսաստանի դեմ պատժամիջոցները: «Հաջորդ մեկ կամ վեց շաբաթվա ընթացքում կգա մի ժամանակ, երբ Թրամփը կարող է դադարեցնել բանակցությունները և կոշտ պատժամիջոցներ կիրառել», – նշել է նա։
Politico-ի զրուցակիցների խոսքով՝ ԱՄՆ վարչակազմում և դրանից դուրս կան մարդիկ, որոնք Թրամփին պատմել են այն վնասի մասին, որը պատժամիջոցները հասցնում են ամերիկյան բիզնեսին, և որ դրանք կարող են Ռուսաստանին հեռացնել բանակցություններից։
Այնուամենայնիվ, լրատվամիջոցը նաև գրում է, որ Կոնգրեսի որոշ հանրապետականներ, այդ թվում՝ Սենատի հանրապետական առաջնորդները, կողմ են պատժամիջոցների խստացմանը։
Ինչպես ավելի վաղ նշել էր The Wall Street Journal-ը, Դոնալդ Թրամփի կարծիքը Վլադիմիր Պուտինի մասին սկսել է փոխվել անցյալ շաբաթ տեղի ունեցած հեռախոսազրույցից հետո, որի ընթացքում Պուտինը Թրամփին հստակեցրել է, որ պատրաստ չէ Ուկրաինայում հրադադարի։
Մայիսի 25-ին Ռուսաստանի կողմից Ուկրաինայի վրա զանգվածային հարվածից հետո Թրամփն ասել էր, որ Պուտինը «լիովին խելագարվել է»։
Մայիսի 27-ին էլ նա Truth Social-ում գրել է. «Վլադիմիր Պուտինը չի հասկանում, որ եթե ես չլինեի, Ռուսաստանի հետ մինչ օրս շատ վատ բաներ կկատարվեին, և ես նկատի ունեմ՝ ՇԱՏ վատ։ Նա կրակի հետ է խաղում»։
Թարգմանությունը՝ Էմմա Չոբանյանի
