Պուտինը խելագարվել է․ եթե ցանկանում է ամբողջ Ուկրաինան, դա կբերի ՌԴ-ի կործանմանը․ Թրամփ

ԱՄՆ նախագահ Դոնալդ Թրամփը հայտարարել է, որ ՌԴ նախագահ Վլադիմիր Պուտինը «լիովին խելագարվել է»։ Այս մասին նա գրել է Truth Social սոցիալական ցանցում: Թրամփի մեկնաբանությունները հնչում են այն բանից հետո, երբ ռուսական զորքերը մի քանի օր շարունակ անօդաչու թռչող սարքերով և հրթիռներով հարվածներ են հասցնում Ուկրաինային։

«Ես միշտ շատ լավ հարաբերություններ եմ ունեցել Ռուսաստանի  նախագահ Վլադիմիր Պուտինի հետ, բայց նրա հետ ինչ-որ բան է պատահել։ Նա լրիվ խելագարվել է։ Նա անտեղի շատ մարդկանց է սպանում, և ես միայն զինվորների մասին չեմ խոսում։ Հրթիռներ և անօդաչու թռչող սարքեր են արձակվում Ուկրաինայի քաղաքների վրա՝ առանց որևէ պատճառի։ Ես միշտ ասել եմ, որ նա ուզում է ամբողջ Ուկրաինան, այլ ոչ թե միայն դրա մի մասը, և գուցե դա ճիշտ է, բայց եթե նա դա անի, դա կհանգեցնի Ռուսաստանի կործանմանը»,- նշել է Թրամփը։

Միաժամանակ, նա քննադատել է նաև Ուկրիանայի նախագահ Վլադիմիր Զելենսկիին։

«Նմանապես, նախագահ Զելենսկին իր երկրին օգուտ չի տալիս։ Նրա բերանից դուրս եկող ամեն ինչ խնդիրներ է առաջացնում, ինձ դա դուր չի գալիս, և ավելի լավ է դադարեցվի»,- գրել է Թրափը։

Նա նաև կրկնել է, որ Ուկրաինայում պատերազմը երբեք չէր սկսվի, եթե ինքը նախագահ լիներ․ «Սա Զելենսկիի, Պուտինի և Բայդենի պատերազմն է, ոչ թե Թրամփի։ Ես միայն օգնում եմ մարել մեծ ու տգեղ հրդեհները, որոնք սկսվել են կոպիտ անգործունակության և ատելության պատճառով»։

Ավելի վաղ Թրամփը լրագրողների հետ ճեպազրույցում էր քննադատել ՌԴ նախագահ Վլադիմիր Պուտինին։

«Ես գոհ չեմ այն ամենից, ինչ անում է Պուտինը։ Նա սպանում է շատ մարդկանց, չգիտեմ՝ ինչ է պատահել նրա հետ։ Ես նրան վաղուց գիտեմ, միշտ լավ եմ շփվել, սակայն նա հրթիռներ է ուղարկում քաղաքների վրա ու սպանում մարդկանց, և դա ինձ ընդհանրապես դուր չի գալիս»,- ասել է նա՝ նշելով, որ քննարկում է Ռուսաստանի դեմ պատժամիջոցների  խստացման հնարավորությունը։

Ուկրաինայի ռազմաօդային ուժերի հրամանատարության տվյալներով՝ մայիսի լույս 25-ի գիշերը Ռուսաստանն Ուկրաինայի ուղղությամբ արձակել է առնվազն 69 հրթիռ և 298 անօդաչու թռչող սարք։ Խոցվել է 45 հրթիռ և 266 անօդաչու թռչող սարք։ Վերջին տվյալներով՝ երկրում  հարվածների հետևանքով զոհվել է 12 մարդ, վիրավորվել՝ ավելի քան 50-ը։

Թարգմանությունը՝ Էմմա Չոբանյանի