Բաքվում շինծու գործերով նիստում «տուժողներ» են ցուցմունքներ տվել

Բաքվի զինվորական դատարանում այսօր տեղի է ունեցել Արցախի ղեկավարների և այլ պաշտոնյաների շինծու գործերով հերթական դատական նիստը՝ դատավոր Զեյնալ Աղաևի նախագահությամբ։ Ադրբեջանական լրատվամիջոցների հաղորդմամբ՝ նիստում ցուցմունքներ են տվել, այսպես կոչված, «տուժողներ» ։

Մասնավորապես, «տուժող» Զահիդ Հասանովը պատմել է, իբր, իր գերեվարման և գերության ընթացքում իր նկատմամբ կիրառված խոշտանգումների մասին։ Նա ասել է, թե վիրավորվել է 1994 թվականի մարտի 7-ին Ֆիզուլիի շրջանի գյուղերից մեկում և այնտեղ մնացել մինչև մարտի 8-ը։

«Մարտի 8-ին հայերը մտան գյուղ։ Նրանք մեզանից չորսին՝ վիրավորներին, գերի վերցրին։ Երբ մեզ տարան ԿամԱԶ բեռնատարով, վիրավորներին տանջեցին»,- հայտարարել է «տուժողը»։

Նա պատմել է, որ իրենց թողել են Ստեփանակերտի N3 հիվանդանոցում, այնտեղ են եղել նաև գերիներ ու պատանդներ։ Հասանովը նաև բողոքել է Կարմիր Խաչի Միջազգային կոմիտեից՝ հայտարարելով, թե իրենցով, իբր, չէր հետաքրքրվել։

«Կոմիտեում կար Մարկ անունով մի ներկայացուցիչ, իսկ նրա բուժքույրը Վերոնիկան էր։ Ես այնտեղ մնացի մոտ մեկուկես ամիս։ Այդ ընթացքում Մարկը երկու անգամ այնտեղ եկավ։ Նա չզննեց մեր վերքերը և ոչինչ չարեց։ Հետո մեզ տարան Շուշիի բանտ, Մարկն ընդհանրապես այնտեղ չեկավ»,- ասել է նա։

Այսօր ավելի վաղ նիստում նիստում դատախազի հարցերին պատասխանել էր հայ ռազմագերիներից Մելիքսեթ Փաշայանը։

Հաջորդ դատական նիստը նշանակվել է մայիսի 29-ին։

Թարգմանությունը՝ Էմմա Չոբանյանի