Քաղաքականություն
26.05.2025 | 12:08
ԱՄՆ նախագահ Դոնալդ Թրամփը հայտարարել է, որ համաձայնել է մինչև հուլիսի 9-ը հետաձգել Եվրամիությունից ներմուծվող ապրանքների համար 50 տոկոս մաքսատուրքի սահմանումը։ Սա ևս մեկ դեպք է, երբ Թրամփը հայտարարում է մոտալուտ մաքսատուրքի մասին, շփոթություն առաջացնում շուկաներում, ապա չեղարկում սպառնացող մաքսատուրքերը, գրում է CNN-ը։
Թրամփը նշել է, որ Եվրահանձնաժողովի նախագահ Ուրսուլա ֆոն դեր Լեյենի հետ «շատ հաճելի հեռախոսազանգ» է ունեցել, որը հանգեցրել է մաքսատուրքերի հետաձգման։
«[Ֆոն դեր Լեյենը] ասել է, որ ցանկանում է լուրջ բանակցություններ սկսել»,- Նյու Ջերսիի Մորիսթաուն քաղաքի օդանավակայանում լրագրողների հետ ճեպազրույցում ասել է Թրամփը։
«Հուլիսի 9-ն այն ամսաթիվն է, որը նա խնդրել է։ Կարո՞ղ ենք այն հունիսի 1-ից տեղափոխել հուլիսի 9-ը։ Ես համաձայնեցի դա անել։ Նա ասաց, որ մենք կհավաքվենք և կտեսնենք՝ կարո՞ղ ենք ինչ-որ բան մտածել»,- հավելել է ԱՄՆ նախագահը։
Լրագրողների հետ զրույցից մի քանի րոպե անց Թրամփը Truth Social-ում գրել է, որ «բանակցությունները կսկսվեն արագ»։
Ֆոն դեր Լեյենն իր հերթին X-ում գրել է Թրամփի հետ «լավ զրույցի» մասին։
«ԵՄ-ն ու ԱՄՆ-ն ունեն աշխարհի ամենահետևողական և սերտ առևտրային հարաբերությունները։ Եվրոպան պատրաստ է արագ և վճռականորեն առաջ մղել բանակցությունները։ Մեզ մինչև հուլիսի 9-ը ժամանակ կպահանջվի լավ համաձայնության հասնելու համար»,- նշել է Եվրահանձնաժողովի նախագահը։
Մաքսատուրքերի հետաձգման մասին լուրից հետո Ասիայի ֆոնդային շուկաները երկուշաբթի համեստ աճ են գրանցել։
Հիշեցնենք՝ ավելի վաղ Թրամփը հայտարարել էր, որ հունիսի 1-ից ԵՄ-ից ներմուծվող ապրանքների համար 50 տոկոս մաքսատուրք կսահմանվի։
«Մեր քննարկումները նրանց հետ ոչ մի տեղ չեն տանում։ Հետևաբար, ես խորհուրդ եմ տալիս Եվրամիության համար սահմանել ուղիղ 50% մաքսատուրք՝ սկսած 2025 թվականի հունիսի 1-ից»,- նշել էր նա։
Թարգմանությունը՝ Էմմա Չոբանյանի
