16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
Թրամփը ԵՄ-ին սպառնում է 50%, Apple-ին՝ 25% մաքսատուրքերով
Քաղաքականություն
23.05.2025 | 19:59
ԱՄՆ նախագահ Դոնալդ Թրամփը հայտարարել է, որ «կառաջարկի» 50% մաքսատուրք սահմանել ԵՄ-ից ԱՄՆ ներմուծվող բոլոր ապրանքների վրա, գրում է BBC-ն։
«Մեր քննարկումները նրանց հետ ոչնչի չեն հանգեցնում»,- գրել է նա սոցցանցում՝ նշելով, որ նոր մաքսատուրքերն ուժի մեջ կմտնեն հունիսի 1-ից։
Այս հայտարարությունը նշանավորում է Թրամփի ու ԵՄ-ի միջև առևտրային պատերազմի սրումը։ Սկզբում նա առաջարկել էր ԵՄ ապրանքների մեծ մասի համար 20% մաքսատուրք սահմանել, սակայն մինչև հուլիսի 8-ն այն կիսով չափ կրճատել էր մինչև 10%՝ բանակցությունների համար ժամանակ տրամադրելու համար։
Թրամփը նաև սպառնացել է «առնվազն» 25% ներմուծման մաքսատուրք սահմանել Ամերիկայում չարտադրված iPhone-ների համար։
«Ես վաղուց տեղեկացրել եմ Apple-ի ղեկավար Թիմ Քուքին, որ ակնկալում եմ, որ նրանց iPhone-ները, որոնք կվաճառվեն Ամերիկայի Միացյալ Նահանգներում, կարտադրվեն և կկառուցվեն Միացյալ Նահանգներում, այլ ոչ թե Հնդկաստանում կամ որևէ այլ վայրում։ Եթե այդպես չէ, Apple-ը պետք է ԱՄՆ-ին վճարի առնվազն 25% մաքսատուրք»,- ասել է նա։
Սպիտակ տուն վերադառնալուց ի վեր Թրամփը տարբեր մաքսատուրքեր է սահմանել և սպառնացել սահմանել աշխարհի տարբեր երկրների նկատմամբ՝ դրանք համարելով ԱՄՆ արտադրությունը խթանելու և աշխատատեղերն արտաքին մրցակցությունից պաշտպանելու միջոց։ Ուրբաթ Թրամփը հայտարարել է, որ ԵՄ-ի հետ «շատ դժվար է գործ ունենալ»։
«Մեր քննարկումները նրանց հետ ոչ մի տեղ չեն տանում։ Հետևաբար, ես խորհուրդ եմ տալիս Եվրամիության համար սահմանել ուղիղ 50% մաքսատուրք՝ սկսած 2025 թվականի հունիսի 1-ից»,- հավելել է նա։
Թրամփն ասել է, որ մաքսատուրք չի գանձվի, եթե ապրանքը «կառուցվի կամ արտադրվի Միացյալ Նահանգներում»։
Նրա նախազգուշացումը Apple-ին հնչում է այն բանից հետո, երբ տեխնոլոգիական հսկան հայտարարել էր, որ իր iPhone-ների և ԱՄՆ-ում վաճառվող այլ սարքերի մեծ մասի արտադրությունը տեղափոխում է Չինաստանից։
Apple-ի գործադիր տնօրեն Թիմ Քուքն այս ամսվա սկզբին հայտարարել էր, որ առաջիկա ամիսներին ԱՄՆ շուկա դուրս եկող iPhone-ների մեծ մասը կարտադրվի Հնդկաստանում, մինչդեռ Վիետնամը կլինի iPad-ների և Apple Watch-երի նման ապրանքների արտադրության խոշոր կենտրոն։
Թարգմանությունը՝ Էմմա Չոբանյանի
