Քաղաքականություն
26.05.2025 | 09:49Պաշտպանության նախարար Սուրեն Պապիկյանը թեև խորհրդարանում էր, ըստ «Հայաստան» խմբակցության պատգամավոր Գեղամ Մանուկյանի, չմասնակցեց ԱԺ պաշտպանության և անվտանգության հարցերի մշտական հանձնաժողովի նիստին։ Նշենք, որ օրակարգում Փողի դիմաց զինվորական ծառայությունից ազատվելու մասին նախագծի քննարկումն էր։ Նախագծով առաջարկվում է 24 մլն դրամ վճարել և բանակում երկու տարվա փոխարեն ծառայել մեկ ամիս, իսկ 18 մլն դրամի դիմաց՝ չորս ամիս։
Նիստը նախագահող ՔՊ-ական Արմեն Խաչատրյանը հայտարարեց, որ նախագծի քննարկումը հետաձգվում է լրացուցիչ ուսումնասիրության նպատակով։
«Հայաստան» խմբակցության պատգամավոր Գեղամ Մանուկյանի համար անհասկանալի է, թե ինչու որոշվեց այսօր չեղարկել, երբ Պաշտպանության նախարարն արդեն ԱԺ էր եկել։
«Հանրային մեծ ընդվզում կա։ Մենք հետամուտ ենք լինելու, որ այս հարցն ընդմիշտ Հայաստանի օրակարգից դուրս բերվի»,- նշեց Մանուկյանը։
ՔՊ-ական պատգամավոր Հայկ Սարգսյանն էլ, որ նախագծի հեղինակն է, ասաց, թե հանրային լայն շրջանակները մեծ սպասում ունեն այս նախագծից։
«Շատերը սպասում են օրենքի նախագծի ընդունմանը, ինչն իր հետ բերելու է ներգաղթ, արտագաղթի կանխում»,- ասաց նա։
ՔՊ-ականը ցավում է, որ նախագծի քննարկումը չեղարկվեց, հույս ունի՝ մինչև առաջիկա զորակոչը օրենքը կընդունվի երկու ընթերցումներով։
Մանրամասները՝ տեսանյութում։
