19.12.2025 | 18:58
Ադրբեջանի խորհրդարանը հաստատել է երկրի պատմության մեջ ամենամեծ համաներումը
Բաքվում շինծու գործերով նիստում Արայիկ Հարությունյանի մասնակցությամբ տեսանյութ է ցուցադրվել
Քաղաքականություն
23.05.2025 | 21:51
Բաքվի զինվորական դատարանում այսօր տեղի է ունեցել Արցախի ղեկավարների, տարբեր պաշտոնյաների շինծու գործերով հերթական դատական նիստը։ Ադրբեջանական լրատվամիջոցները գրում են, որ դատավարության ժամանակ ցուցադրվել է Արցախի նախկին նախագահ Արայիկ Հարությունյանի մասնակցությամբ տեսանյութ։
Կադրերում, իբր, երևում է, թե ինչպես է Արայիկ Հարությունյանը Սամվել Կարապետյանի հետ նստած տանկի վրա և հեռադիտակով դիտարկում տարածքը։ Պատասխանելով պետական մեղադրանքը պաշտպանող դատախազների հարցերին՝ Հարությունյանն ասել է, որ տեսանյութում արտահայտված տեսակետները հայտնել է իր եղբոր անունից։
Նիստի ժամանակ ցուցադրված լուսանկարներից մի քանիսում Հարությունյանը ճանաչել է իրեն։ Դրանց մեծ մասում նա զինվորական համազգեստով է։
Հատուկ հանձնարարությունների գծով Ադրբեջանի գլխավոր դատախազի օգնական Թուգայ Ռահիմլին հարցրել է, թե ինչո՞ւ չեն կատարվել ՄԱԿ-ի բանաձևերը։
«Այդ հարցի վերաբերյալ որոշում կար։ Բայց չգիտեմ, թե ինչու այն չիրականացվեց։ Ես նաև հանդիպել եմ Լևոն Տեր-Պետրոսյանի հետ։ Ես հասկացա, որ միաձայնություն չկար»,- ասել է Արայիկ Հարությունյանը։
Պատասխանելով պետական մեղադրող Վուսալ Աբդուլլաևի հարցերին՝ նա նշել է, որ մասնակցել է Հայաստանի և Արցախի միջև 2018-2019 թվականներին կայացած երկու հանդիպումներից մեկին։
«Ես նախագահի պաշտոնը ստանձնել եմ 2020 թվականի մայիսին։ Հունիսին ես խնդրեցի Հայաստանի վարչապետ Նիկոլ Փաշինյանին հանդիպում հրավիրել։ Ես ցանկանում էի բանակցել Ադրբեջանի հետ և հասնել վերջնական համաձայնության։ Այդ զրույցը ներառում էր նաև ՄԱԿ-ի չորս բանաձևերը»,- ադրբեջանական կողմի հաղորդմամբ՝ ասել է Արայիկ Հարությունյանը։
Հավելենք, որ այսօր ավելի վաղ նիստում Շուշիի ազատագրման հետ կապված կադրեր էին ցուցադրվել, Լևոն Մնացականյանն ու Դավիթ Մանուկյանը պատասխանել էին մեղադրողների հարցերին։
Հաջորդ դատական նիստը նշանակվել է մայիսի 26-ին։
Թարգմանությունը՝ Էմմա Չոբանյանի
