Բաքվում շինծու գործերով նիստում Շուշիի ազատագրման հետ կապված կադրեր են ցուցադրվել, Լևոն Մնացականյանն ու Դավիթ Մանուկյանը հարցերի են պատասխանել

Բաքվի զինվորական դատարանում, դատավոր Զեյնալ Աղաևի նախագահությամբ, ընթանում է Արցախի ղեկավարների և այլ պաշտոնյաների՝ ընդհանուր 15 անձի նկատմամբ հարուցված շինծու գործերով դատական նիստը։ Ադրբեջանական լրատվամիջոցների հաղորդմամբ՝ Արցախի ՊԲ նախկին հրամանատար Լևոն Մնացականյանը հաստատել է իր  մասնակցությունը, իբր, «Ադրբեջանի տարածքների օկուպացիային»։

Նա հայտարարել է, որ տարբեր տարիների ԼՂՀ-ում զբաղեցրել է գումարտակի հրամանատարի, դիվիզիայի հրամանատարի և հրետանու պետի պաշտոններ։ Պատասխանելով պետական մեղադրողների հարցերին՝ նա նշել է, որ Սամվել Կարապետյանի հրամանատարության տակ գտնվող զորամասի կազմում մասնակցել է տարբեր ռազմական գործողությունների։

«Ես մասնակցել եմ Աղդամի, Ջաբրայիլի, Մարտակերտի, Ֆիզուլիի և այլ շրջանների ռազմական գործողություններին»,- ասել է Մնացականյանը։

Բացի այդ, դատական նիստում ուսումնասիրվել են տեսանյութեր, որոնք, իբր, բացահայտում են օտարերկրյա անձանց մասնակցությունը «Շուշի քաղաքի առանձին գումարտակի գործունեությանը, որը ստեղծվել է Հայաստանի նախաձեռնությամբ»։ Կադրերում, իբր, ասվում է, որ «Շուշի քաղաքի առանձին գումարտակը» ստեղծվել է 1991 թվականի նոյեմբերի 5-ին տարբեր երկրներից՝ ԱՄՆ-ից, Կանադայից, Սիրիայից և Հայաստանից ժամանած ավելի քան 210 դաշնակցականների և կամավորների կողմից։

Նյութերում ասվում է, որ Ղարաբաղի ազատագրման համար մարտերին մասնակցած մոտ 100 սփյուռքահայերից 65-ն այդ գումարտակի մարտիկներ էին։

Ըստ ադրբեջանական աղբյուրների՝ Արցախի ՊԲ հրամանատարի նախկին տեղակալ Դավիթ Մանուկյանն էլ հաստատել է իր ներկայությունը այդ կադրերում և նշել,  որ այդ գումարտակի կազմում մասնակցել է Մարտակերտի և Քարվաճառի մարտական ​​գործողություններին։ Պետական ​​մեղադրողի հարցերին ի պատասխան՝ Մանուկյանը պնդել է, որ գումարտակում վարձկաններ չեն եղել, այլ մասնակցել են օտարերկրյա պետություններից ժամանած անձինք։

Հիշեցնենք, որ մայիսի 22-ին տեղի ունեցած նախորդ նիստում ներկայացվել էր Արցախի ԱԺ նախագահ Դավիթ Իշխանյանի՝ 2016 թվականին Արցախի հեռուստաընկերությանը տված հարցազրույցը, ՀՀ առաջին նախագահ Լևոն Տեր-Պետրոսյանի և Արցախի ներկայացուցիչների միջև 1993 թվականին կայացած հանդիպման տեսագրությունը, ինչպես նաև Շուշիի ազատագրմանը Լևոն Մնացականյանի մասնակցության մասին տեսանյութ։

Թարգմանությունը՝ Էմմա Չոբանյանի