Թրամփի վարչակազմը Հարվարդի համալսարանին արգելել է օտարերկրյա ուսանողների ընդունել

ԱՄՆ նախագահ Դոնալդ Թրամփի վարչակազմն արգելել է Հարվարդի համալսարանին օտարերկրյա ուսանողների ընդունել։  Համալսարանում արդեն իսկ սովորող օտարերկրյա ուսանողները ստիպված կլինեն տեղափոխվել մեկ այլ համալսարան կամ լքել երկիրը, գրում է DW-ն։

ԱՄՆ ներքին անվտանգության դեպարտամենտը հինգշաբթի հայտնել է, որ չեղյալ է հայտարարել Հարվարդի համալսարանի՝ միջազգային ուսանողներ ընդունելու իրավունքը։

Թրամփը վրդովմունք էր հայտնել, որ Հարվարդը մերժել է ուսանողների ընդունելության և աշխատանքի ընդունման վերահսկողությանը ենթարկվելու իր պահանջը, այն բանից հետո, երբ նա ասել էր, որ համալսարանը հակասեմականության կենտրոն է։

«Հարվարդի համալսարանի ուսանողական և փոխանակման այցելուների (SEVIS) ծրագրի հավաստագիրը անմիջապես չեղյալ է հայտարարվում։ Ինչպես ես բացատրել եմ ապրիլի իմ նամակում՝ արտոնություն է արտասահմանցի ուսանողներին ընդունելը։ Ներքին անվտանգության նախարարությանը համապատասխան տեղեկատվություն տրամադրելու բազմաթիվ հարցումներին ձեր կողմից հրաժարվելու և հրեա ուսանողների նկատմամբ թշնամական, ՀԱՄԱՍ-ի նկատմամբ համակրանք խրախուսող և ռասիստական ​​«բազմազանության, հավասարության և ներառման» քաղաքականություն պարտադրող համալսարանական միջավայր պահպանելու հետևանքով դուք կորցրել եք այդ արտոնությունը»,- գրել է ներքին անվտանգության նախարար Քրիստի Նոյեմը։

Նրա հայտարարության մեջ նաև ասվում է, որ Հարվարդի դեմ ձեռնարկված քայլերը պետք է «ծառայեն որպես նախազգուշացում երկրի բոլոր համալսարանների և ակադեմիական հաստատությունների համար»։ Նոյեմը նշել է, որ Հարվարդը կարող է վերականգնել օտարերկրյա ուսանողներին ընդունելու հնարավորությունը, եթե հաջորդ 72 ժամվա ընթացքում ներկայացնի օտարերկրյա ուսանողների մասին գրառումների մի ամբողջ հավաքածու, այդ թվում՝ աուդիո կամ վիդեո նյութեր, որոնք վերաբերում են օտարերկրյա ուսանողների մասնակցությանը բողոքի ցույցերին կամ վտանգավոր գործունեությանը համալսարանում։

«Այս վարչակազմը Հարվարդին պատասխանատվության է ենթարկում բռնության, հակասեմականության խթանման և Չինաստանի կոմունիստական ​​կուսակցության հետ համակարգված աշխատանքի համար»,- հավելել է Նոյեմը հայտարարության մեջ։

Հարվարդը հերքել է կառավարության մեղադրանքները և հայտարարել, որ կաջակցի օտարերկրյա ուսանողներին։

«Կառավարության գործողություններն անօրինական են։ Այս պատասխան գործողությունը լուրջ վնաս է հասցնում Հարվարդի համայնքին և մեր երկրին, խաթարում է Հարվարդի ակադեմիական և հետազոտական ​​առաքելությունը»,- ասվում է բուհի տարածած հայտարարության մեջ։

Համալսարանը վերահաստատել է միջազգային ուսանողներին կրթելու հանձնառությունը։

2024-25 ուսումնական տարում Հարվարդի համալսարանի գրեթե 6800 ուսանող, որը կազմում է համալսարանի  ուսանողների ավելի քան մեկ քառորդը, Միացյալ Նահանգներից  չեն։

Հիշեցնենք, որ ավելի վաղ Թրամփի վարչակազմը հայտարարել էր, որ դադարեցնում է Հարվարդի համալսարանին տրամադրվող 2,2 միլիարդ դոլարի դաշնային ֆինանսավորումը՝ բուհին մեղադրելով քաղաքացիական իրավունքների մասին օրենքները խախտելու և հակասեմականության դեմ բավարար չափով չպայքարելու մեջ։ Ի պատասխան՝ համալսարանը դատական հայց է ներկայացրել։

Թարգմանությունը՝ Էմմա Չոբանյանի