ՔԿ-ի շենքից խոշոր չափերով գումար հափշտակելու դեպքի առթիվ նախաձեռնվել է քրեական վարույթ. ձերբակալվել է մեկ անձ. Հակակոռուպցիոն կոմիտե

Հակակոռուպցիոն կոմիտեն հաստատել է լուրը, որ ՔԿ-ի շենքից խոշոր չափերով գումար են հափշտակել։ Կոմիտեն նշում է, որ նախաձեռնվել է քրեական վարույթ, ձերբակալվել է մեկ անձ։

«ՀՀ քննչական կոմիտեից ստացված հաղորդման հիման ՀՀ քրեական օրենսգրքի 446–րդ հոդվածի 2–րդ մասի և ՀՀ քրեական օրենսգրքի 254–րդ հոդվածի 3–րդ մասի 2–րդ և 4–րդ կետերի հատկանիշներով ՀՀ հակակոռուպցիոն կոմիտեում նախաձեռնվել է քրեական վարույթ՝ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության՝ Երևան քաղաքի Դեղատան 3 հասցեում գտնվող վարչական շենքից առանձնապես խոշոր չափերով գումար հափշտակելու դեպքի առթիվ։ Այս մասին տեղեկացնում են Հակակոուպցիոն կոմիտեից։

Քրեական վարույթով նախաքննության ընթացքում ձերբակալվել է մեկ անձ։ Հանցագործությունը բացահայտելու ուղղությամբ ձեռնարկվել և իրականացվում են լայնածավալ օպերատիվ–հետախուզական և ապացուցողական գործողություններ։
Նախաքննությունը շարունակվում է»,- ասված է հաղորդագրության մեջ։

Ավելի վաղ «Փաստինֆո»-ն, հղում կատարելով իրավապահ համակարգում իր աղբյուրներին, հայտնել էր, որ նախորդ գիշեր Քննչական կոմիտեի Տնտեսական հանցագործությունների և մաքսանենգությունների քննության գլխավոր վարչության շենքից հափշտակվել է որպես իրեղեն ապացույց պահվող 590.000 դոլար։ Լրատվամիջոցի տեղեկություններով՝ չհրկիզվող պահարանը, որտեղ պահվում էր գումարը, եղել է 6-րդ հարկում, իսկ գողություն կատարած անձը շենք է մուտք գործել քննիչի կեղծ անցագրով։