Բաքուն հայտնել է միջազգային ահաբեկչական կազմակերպությունների հետ կապված Ադրբեջանի քաղաքացիների ձերբակալության մասին

Ադրբեջանի Պետական ​​անվտանգության ծառայությունը հայտարարել է հարուցված քրեական գործերով համապարփակ օպերատիվ-հետախուզական միջոցառումների մասին՝ կապված միջազգային ահաբեկչական կազմակերպությունների հետ կապեր ունեցող Ադրբեջանի քաղաքացիներից կազմված հանցավոր խմբերի ստեղծման, ահաբեկչական գործողություններ նախապատրաստելու, երկրի հյուսիսային շրջանների անտառային տարածքներում ստորգետնյա ապաստարաններ ստեղծելու, այդ ապաստարանները զենքով, զինամթերքով, պայթուցիկ նյութերով, տեխնիկական սարքավորումներով և այլ անհրաժեշտ պարագաներով մատակարարելու գործունեության հետ։

Ըստ հաղորդագրության՝ հետաքննության ընթացքում պարզվել է, որ Ադրբեջանի քաղաքացիներ Վուգար Նաջաֆլին, Ջամալ Գյոզալովը, Թոֆիկ Յուսիֆլին և Դադաշ Հաշիմովը, որոնք ահաբեկչական հանցագործություններ կատարելու նպատակով ստեղծված խմբի մաս են կազմել, 2024 թվականին լքել են Ադրբեջանի տարածքը և թաքնվել Պակիստանի ու Աֆղանստանի սահմանին գտնվող լեռնային տարածքներում։ Հաստատվել է, որ նրանք մասնակցել են զորավարժությունների և զինված բախումների, ինչպես նաև միջազգային ահաբեկչական կազմակերպության կազմում անցել են զինված պատրաստություն Ադրբեջանից դուրս՝ հանցավոր նպատակներով։

Նշվում է, որ ՊԱԾ-ի կողմից գործընկեր օտարերկրյա հետախուզական ծառայությունների և իրավապահ մարմինների հետ համատեղ իրականացված օպերատիվ-հետախուզական միջոցառումների արդյունքում հետաքննության տակ գտնվող անձինք ձերբակալվել են օտարերկրյա պետություններում և հանձնվել Ադրբեջանին։ Պարզվել է նաև, որ  Թոֆիկ Յուսիֆլիի և Դադաշ Հաշիմովի ահաբեկչական գործունեությունը ֆինանսավորվել է Ադրբեջանի  քաղաքացիներ Միր Ջավադ Հուսեյնլիի և Թուրալ Աղաևի կողմից, որոնց հետ կապված բացահայտվել են նաև այլ հանցավոր գործողություններ։

Հանցավոր խմբի վերոնշյալ անդամները քրեական պատասխանատվության են ենթարկվել Ադրբեջանի Քրեական օրենսգրքի 214-1 (ահաբեկչության ֆինանսավորում), 283-1.3 (կրոնական շարժումների տարածում,  կրոնական ծեսերի պատրվակով զորավարժություններին և զինված բախումներին մասնակցություն, կրոնական ատելության հիման վրա) և այլ հոդվածներով, դատարանի որոշմամբ՝ նրանց նկատմամբ կիրառվել է կալանք։

Նշվում է, որ շարունակվում են քննչական և օպերատիվ-հետախուզական միջոցառումները։

Հավելենք, որ ադրբեջանական լրատվամիջոցներն ավելի վաղը հայտնել էին, որ Պետական ​​անվտանգության ծառայությունն արտասահմանում ձերբակալել է ահաբեկչության մեջ կասկածվող զգալի թվով հետախուզվող անձանց և նրանց վերադարձրել երկիր։

Թարգմանությունը՝ Էմմա Չոբանյանի