Քաղաքականություն
16.05.2025 | 21:20
Ստամբուլում Ուկրաինայի հետ բանակցությունների ժամանակ ռուսական պատվիրակությունը սպառնացել է գրավել Խարկովի և Սումիի մարզերը։ Այս մասին հայտնել է The Economist-ի թղթակից Օլիվեր Քերոլը՝ X-ի իր միկրոբլոգում հղում անելով «տեղեկացված աղբյուրին»։
Նրա խոսքով՝ ռուսական պատվիրակությունը հայտարարել է, որ Մոսկվան կհամաձայնվի հրադադարի միայն այն դեպքում, եթե Ուկրաինան դուրս բերի իր զորքերը Ռուսաստանի կողմից բռնակցված չորս շրջաններից։
«Մոսկվան նաև սպառնացել է գրավել ևս երկուսը՝ Խարկովը և Սումին»,- գրել է Քերոլը։
Նա պնդում է, որ ռուսական պատվիրակության ղեկավար Վլադիմիր Մեդինսկին ասել է, որ Ռուսաստանը «պատերազմ չի ուզում», բայց «պատրաստ է կռվել մեկ, երկու, երեք տարի՝ անկախ նրանից, թե որքան ժամանակ կպահանջվի»։
«Մենք 21 տարի կռվել ենք Շվեդիայի դեմ։ Որքա՞ն եք պատրաստ կռվել։ Հնարավոր է, որ այս սեղանի շուրջ նստածներից մեկը կորցնի ավելի շատ սիրելիների: Ռուսաստանը պատրաստ է հավերժ կռվել»,- լրագրողի խոսքով՝ ասել է Մեդինսկին։
Հիշեցնենք, որ Ուկրաինայի Գերագույն ռադայի պատգամավոր Ալեքսեյ Գոնչարենկոն հայտարարել է, որ հանդիպմանը Ռուսաստանը պահանջել է ուկրաինական զորքերի դուրսբերում «բոլոր այն շրջաններից, որոնք ավելացրել է իր Սահմանադրությանը» (Լուգանսկից, Դոնեցկից, Խերսոնից և Զապորոժիեից):
Թարգմանությունը՝ Էմմա Չոբանյանի
