29.04.2026 | 22:21
Պուտինն ու Թրամփը հեռախոսազրույց են ունեցել
Չինաստանն ու ՌԴ-ն խորացնում են գործընկերությունը․ Պուտինն ու Սի Ցզինպինը հայտարարություն են ստորագրել
Քաղաքականություն
08.05.2025 | 18:42
ՌԴ նախագահ Վլադիմիր Պուտինը Կրեմլում այսօր բանակցություններ է անցկացրել Չինաստանի նախագահ Սի Ցզինպինի հետ, որը Մոսկվա է ժամանել հաղթանակի 80-ամյակին նվիրված միջոցառումներին մասնակցելու համար։
Հանդիպումից հետո կողմերը ստորագրել են մի շարք համաձայնագրեր, այդ թվում՝ Ռուսաստանի և Չինաստանի համատեղ հայտարարությունը «նոր դարաշրջանում համապարփակ գործընկերության և ռազմավարական փոխգործակցության հարաբերությունների հետագա խորացման» վերաբերյալ։
«Վլադիմիր Պուտինը և Սի Ցզինպինը ստորագրել են Ռուսաստանի Դաշնության և Չինաստանի Ժողովրդական Հանրապետության համատեղ հայտարարություն՝ նոր դարաշրջանում համապարփակ գործընկերության և ռազմավարական փոխգործակցության հետագա խորացման վերաբերյալ՝ ի նշանավորումն Խորհրդային Միության Հաղթանակի 80-ամյակի Հայրենական Մեծ պատերազմում, չինացի ժողովրդի հաղթանակի Ճապոնական ագրեսիայի դեմ դիմադրության պատերազմում և Միավորված Ազգերի Կազմակերպության կազմավորման», – ասվում է Կրեմլի հայտարարության մեջ։
BBC-ի ռուսական ծառայությունը նշում է, որ համատեղ հայտարարության մեջ հիշատակվում է նաև Ուկրաինան։
«Կողմերը համոզված են, որ ուկրաինական ճգնաժամի երկարաժամկետ և կայուն կարգավորման համար անհրաժեշտ է վերացնել դրա սկզբնական պատճառները՝ պահպանելով ՄԱԿ-ի կանոնադրության սկզբունքները», – ասվում է փաստաթղթում։ Պուտինը մշտապես պահանջում է հաշվի առնել «հիմնական պատճառները», որոնք, նրա պնդմամբ, հանգեցրել են Ռուսաստանի նախագահի կողմից 2022 թվականի փետրվարի 24-ին սկսված պատերազմին։
Համատեղ հայտարարության մեջ Ռուսաստանը շնորհակալություն է հայտնել Պեկինին «ուկրաինական ճգնաժամի վերաբերյալ» իր «օբյեկտիվ և անաչառ դիրքորոշման» համար։
Ռուսաստանը և Չինաստանը նաև հայտարարել են, որ կշարունակեն ամրապնդել ռազմական և ռազմատեխնիկական համագործակցությունը։ Կողմերը նաև արձանագրել են միջուկային պատերազմի անթույլատրելիությունը։
Թարգմանությունը՝ Էմմա Չոբանյանի
