Կրեմլում մեկնարկել են Վլադիմիր Պուտինի ու Սի Ցզինպինի բանակցությունները

Կրեմլում մեկնարկել է ՌԴ նախագահ Վլադիմիր Պուտինի և Չինաստանի նախագահ Սի Ցզինպինի հանդիպումը, գրում է ՌԲԿ-ն։

Չինաստանի առաջնորդը Մոսկվա է ժամանել՝ մասնակցելու Երկրորդ համաշխարհային պատերազմում հաղթանակի 80-ամյակին նվիրված միջոցառումներին։

Հանդիպումը սկսվել է պաշտոնական արարողությամբ՝ կարմիր գորգի վրա ձեռքսեղմումով և պաշտոնական լուսանկարով։ Այնուհետև մեկնարկել են նեղ կազմով բանակցությունները։

Ըստ ռուսական աղբյուրների՝ Պուտինն ասել է, որ Ռուսաստանը և Չինաստանը զարգացնում են կապերը երկու երկրների ժողովուրդների բարօրության համար և «ոչ թե որևէ մեկի դեմ»։

«Մեր ժողովուրդների ռազմավարական եղբայրությունը, որը զարգացել է այդ դժվարին պատերազմի տարիներին, ժամանակակից ռուս-չինական համապարփակ գործընկերության և ռազմավարական փոխգործակցության հիմքերից մեկն է»,- ասել է նա։

ՌԴ նախագահը շնորհակալություն է հայտնել Սի Ցզինպինին Հաղթանակի 80-ամյակի տոնակատարությունը Ռուսաստանի հետ կիսելու որոշման համար։ Նա նշել է, որ մայիսի 9-ի շքերթին Չինաստանի ստորաբաժանումը կլինի ամենամեծը ցանկացած օտարերկրյա ուժերի շարքում։ Պուտինի խոսքով՝ Ռուսաստանի և Չինաստանի կառավարություններն աշխատում են երկկողմ համաձայնագրերի ամբողջ շրջանակի իրականացման ուղղությամբ։

Սի Ցզինպինն իր հերթին նշել է, որ վերջին 80 տարիների ընթացքում «չինացի և ռուս ժողովուրդները ծանր կորուստների գնով մեծ հաղթանակի են հասել և անջնջելի պատմական ներդրում են ունեցել համաշխարհային խաղաղության և մարդկության առաջընթացի գործում»։

«Այսօր աշխարհում, միակողմանի գործողությունների և ուժային թելադրանքի բացասական միտման պայմաններում, Չինաստանը պատրաստ է համատեղ կրել հատուկ պատասխանատվություն Ռուսաստանի հետ՝ որպես խոշոր համաշխարհային տերություններ և ՄԱԿ-ի Խորհրդի մշտական ​​անդամներ, և պարտքի զգացումով համարձակորեն պաշտպանել Երկրորդ համաշխարհային պատերազմի պատմության մասին ճշմարտությունը»,- հայտարարել է Չինաստանի ղեկավարը։

Թարգմանությունը՝ Էմմա Չոբանյանի