Հնդկաստանի ԶՈՒ-ն սկսել է «Սինդուր» գործողությունը՝ հարված հասցնելով Պակիստանում «ահաբեկչական ենթակառուցվածքներին»

Հնդկաստանը հայտարարել է, որ ռազմական գործողություն է սկսել Պակիստանի դեմ՝ հարված հասցնելով «ահաբեկչական ենթակառուցվածքներին» ինչպես Պակիստանում, այնպես էլ Պակիստանի կողմից կառավարվող Քաշմիրում։ Այս մասին տեղեկացնում է CNN-ը։

«Այս քայլերը ձեռնարկվել են Փահալգամի բարբարոսական ահաբեկչությունից հետո, որի հետևանքով սպանվել է 25 հնդիկ և Նեպալի մեկ քաղաքացի», – ասվում է Հնդկաստանի պաշտպանության նախարարության հայտարարության մեջ:

«Մեր գործողությունները եղել են նպատակաուղղված, հավասարակշռված և չեն ուղեկցվել էսկալացիայով։ Պակիստանյան ոչ մի ռազմական օբյեկտ հարձակման չի ենթարկվել։ Հնդկաստանը զգալի զսպվածություն է ցուցաբերել թիրախների և դրանց իրականացման մեթոդների ընտրության հարցում», – ասվում է հայտարարության մեջ։

Հնդկաստանը հայտնել է, որ ընդհանուր առմամբ թիրախավորվել է 9 օբյեկտ։

CNN-ի փոխանցմամբ՝ Պակիստանի վերահսկողության տակ գտնվող Քաշմիրում մի քանի պայթյուն է լսվել:

Պակիստանի զինվորականները հայտնել են, որ երեք օբյեկտների վրա հրթիռային հարվածներ են հասցվել:

«Պակիստանը կպատասխանի դրան այն ժամանակ և վայրում, որն ինքը կընտրի»,- Geo TV-ին ասել է պակիստանցի զինվորականների ներկայացուցիչ Ահմեդ Շարիֆ Չաուդրին՝ նշելով, որ այս սադրանքն անպատասխան չի մնա։

Պակիստանը 48 ժամով փակել է իր օդային տարածքը, հաղորդում է Samaa TV-ն։

Հիշեցնենք, որ Հնդկաստանի և Պակիստանի միջև տասնամյակներ շարունակվող հակամարտությունը սրվել է այն բանից հետո, երբ ապրիլի 22-ին Հնդկաստանի Փահալգամ զբոսաշրջային քաղաքում զինյալների խմբի կողմից իրականացված հարձակման հետևանքով սպանվել է 26 մարդ։ Զոհվածների մեծ մասը զբոսաշրջիկներ են։ Հարձակման պատասխանատվությունը ստանձնել է Պակիստանի կողմից աջակցվող Դիմադրության ճակատ (TRF) ապստամբական խմբավորումը, որը Հնդկաստանում համարվում է ահաբեկչական։

Հարձակումից հետո Հնդկաստանի իշխանությունները հրամայել էին Պակիստանի բոլոր քաղաքացիներին լքել երկիրը մինչև ապրիլի 29-ը, նույնիսկ եթե նրանք այդ ամսաթվին վավեր վիզաներ ունեն։ Բացի այդ, Հնդկաստանի կառավարությունը հրամայել էր անհապաղ կասեցնել Պակիստանի հետ ջրային ռեսուրսների բաժանման մասին համաձայնագրի՝ 1960 թվականի Ինդոսի ջրերի մասին պայմանագրի գործողությունը։ Ի պատասխան՝ Իսլամաբադը նշել էր, որ Հնդկաստանի կողմից հարևանի ջրամատակարարումը դադարեցնելու ցանկացած փորձ կհամարի «պատերազմական ակտ», նաև հայտարարել դիվանագիտական միջոցների կիրառման մասին։

Հնդկաստանն արգելել էր Պակիստանի ավիաընկերություններին օգտագործել իր օդային տարածքը՝ Փահալգամի ահաբեկչական հարձակումից հետո հարևան երկրի հետ լարվածության սրման ֆոնին։