07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Հնդկական Քաշմիրում զինված անձինք կրակ են բացել զբոսաշրջիկների վրա․ առնվազն 5 մարդ է զոհվել
Քաղաքականություն
22.04.2025 | 21:57
Առնվազն հինգ զբոսաշրջիկ է զոհվել Հնդկաստանի Քաշմիր նահանգի գեղատեսիլ վայրերից մեկում զինված անձանց կողմից կրակ բացելու հետևանքով։ Ոստիկանությունը Փահալգամ հանգստավայրի մոտ տեղի ունեցած կրակոցները որակել է որպես «ահաբեկչական հարձակում» և մեղադրել հնդկական կառավարման դեմ պայքարող զինյալներին, հաղորդում է Sky news-ը։
«Այս հարձակումը շատ ավելի մեծ է, քան վերջին տարիներին քաղաքացիական անձանց դեմ ուղղված որևէ հարձակում։ Զոհերի թիվը դեռևս պարզվում է, ուստի ես չեմ ուզում մանրամասնել»,- ասել է Հնդկաստանի վերահսկողության տակ գտնվող շրջանի ղեկավար Օմար Աբդուլան։
Ոստիկանության աղբյուրը, սակայն, Reuters-ին ասել է, որ առնվազն հինգ մարդ է զոհվել, ութը՝ վիրավորվել։
Ավելի վաղ հնդկական հեռուստաալիքները հայտնել էին, որ հարձակման հետևանքով մեկ մարդ զոհվել է, յոթը՝ վիրավորվել։
Նախնական տեղեկությունների համաձայն՝ զինված անձինք կրակ են բացել հիմնականում հնդիկ զբոսաշրջիկների վրա։ Ոստիկանները հայտնել են, որ մի քանի զբոսաշրջիկներ հրազենային վնասվածքներ են ստացել, վիրավորները հոսպիտալացվել են։ Հարձակվողներին որոնում են։
Լրատվամիջոցը հիշեցնում է, որ միջուկային զենք ունեցող հակառակորդներ Հնդկաստանն ու Պակիստանը կառավարում են Քաշմիրի մի մասը, սակայն երկուսն էլ պնդում են տարածաշրջանի ամբողջականության մասին։
Հնդկաստանի վերահսկողության տակ գտնվող հատվածում զինյալները պայքարում են Նյու Դելիի կառավարման դեմ 1989 թվականից ի վեր։
Հակամարտության ընթացքում զոհվել են տասնյակ հազարավոր քաղաքացիական անձինք, ապստամբներ և կառավարական զորքեր։
Թարգմանությունը՝ Էմմա Չոբանյանի
