Բաքուն ՌԴ-ին է մեղադրում ադրբեջանական իշխանամերձ լրատվամիջոցների դեմ կիբերհարձակումների համար

Բաքուն Մոսկվային է մեղադրում այս տարվա փետրվարին ադրբեջանական իշխանամերձ լրատվամիջոցների նկատմամբ իրականացված կիբերհարձակումների մեջ։ Մասնավորապես, ադրբեջանական լրատվամիջոցների պնդմամբ, հետաքննության արդյունքում թե՛ հարձակումն իրականացնելու համար օգտագործված տեխնիկական մեթոդները, թե՛ վարքագծի օրինաչափությունները պարզել են, որ հարձակումն իրականացրել է Ռուսաստանի հետ կապված APT29 («Cozy Bear») խումբը (այլ անվանումներ՝ Midnight Blizzard, Dukes): «Կիբերհարձակումներ Ադրբեջանի լրատվամիջոցների վրա» թեմայով հանրային քննարկումների ժամանակ այս մասին հայտարարել է Միլլի Մեջլիսի արտաքին միջամտության և հիբրիդային սպառնալիքների հակազդման հանձնաժողովի նախագահ Ռամիդ Նամազովը:

Նա նշել է, որ այս կազմակերպված խումբը հատկապես կարևոր կիբերգործողություններ է իրականացնում։

«APT29-ի կիբերլրտեսական գործունեությունը հիմնականում ուղղված է կառավարական կառույցների, օտարերկրյա դիվանագիտական ​​առաքելությունների, ինչպես նաև քաղաքական, պաշտպանական, էներգետիկ, լրատվամիջոցների և այլ կարևորագույն ոլորտների դեմ։ Ինչ վերաբերում է աշխատանքի մեթոդներին, այն օգտագործում է կիբերմիջամտության բազմազան մեթոդներ և գործիքներ։ Դրանցից մեկը թիրախային համակարգերը նախապես թափանցելն է, այնտեղ հենարան հաստատելը և ճիշտ պահին գործողությունների անցնելը։ Հենց այս մեթոդն ու քաղաքական դրդապատճառներն են, որոնք տարբերում են նրանց մյուս կիբերհանցագործ խմբերից։ Այսպիսով, այս տարվա փետրվարի 20-ի հետաքննության համաձայն՝ APT29 անունով կիբերլրտեսական խումբն ամբողջությամբ տիրանում է սեփական համակարգերում գտնվող մեդիա ռեսուրսներին, որտեղ այն գաղտնի գործել է մոտ 2-3 տարի»,- ասել է Նամազովը։

Նա հավելել է, որ կիբերհոգեբանական վերլուծության արդյունքում պարզ է դարձել, թե որտեղից է գալիս հարձակման դրդապատճառը։

«Մոտիվն այն է, որ փետրվարի 3-ին փակվել է «Ռուսական տուն»-ը՝ ռուսական տեղեկատվական և մշակութային կենտրոնը, որը գրանցված չէր որպես իրավաբանական անձ, և որի գործունեությունը դադարեցվել էր իրավական պահանջների լուրջ խախտումների պատճառով, ինչպես նաև «Russia Today»-ի (Sputnik) ներկայացուցչությունն Ադրբեջանում, որի լուծարման շուրջ բանակցություններ էին ընթանում։ Հենց այդ գործընթացների պատճառով է տեղի ունեցել կիբերմիջամտության  քաղաքականապես մոտիվացված միջադեպը»,- պնդել է ադրբեջանցի պատգամավորը։

Հիշեցնենք, որ փետրվարի 20-ին Ադրբեջանի իշխանությունների կողմից վերահսկվող Global Media Group-ին պատկանող բազմաթիվ լրատվամիջոցների կայքերը, այդ թվում՝ «Report.Az»-ը, «Oxu.Az»-ը, «Media.Az»-ը, «Baku.ws»-ը, «Caliber.Az»-ը և «Baku TV»-ն, հաքերային հարձակման էին ենթարկվել, ինչի հետևանքով դրանց աշխատանքը խափանվել էր։

Թարգմանությունը՝ Էմմա Չոբանյանի