Եղիշե Կիրակոսյանը նոր աշխատանք ունի

Ավելի քան 5 տարի Միջազգային իրավական հարցերով ՀՀ ներկայացուցչի պաշտոնը զբաղեցրած Եղիշե Կիրակոսյանն այսուհետ փաստաբանական ծառայություններ կմատուցի։ Այս մասին նա տեղեկացրել է ֆեյսբուքյան իր էջում։

Կիրակոսյանը նշել է, որ նպատակ ունենալով պահպանել բարձր մասնագիտական չափանիշները՝ գործընկերոջ հետ փաստաբանական գրասենյակ են հիմնում, որը ծառայություններ կմատուցի մարդու իրավունքների, արբիտրաժային, բիզնես գործարքների և այլ ոլորտներում։

Հիշեցնենք՝ Եղիշե Կիրակոսյանը մարտի 5-ին հայտարարեց, որ սեփական դիմումի համաձայն ազատվում է պաշտոնից։

«Ցանկանում եմ առավել կենտրոնանալ ակադեմիական/գիտական և մասնագիտական գործունեության վրա՝ նպաստելով Հայաստանի Հանրապետությունում միջազգային իրավունքի ամրապնդմանը, ինչպես նաև իրավագիտական կրթության զարգացմանը։ Միաժամանակ, գրասենյակն իր հիմնադրումից ի վեր իրականացրել է մարդու իրավունքների միջազգային չափորոշիչների ներդրումն իրավական ակտերի նախագծերում։

2020թ. 44-օրյա պատերազմից ի վեր գրասենյակը ձեռնամուխ է եղել Մարդու իրավունքների եվրոպատական դատարանում և Արդարադատության միջազգային դատարանում Ադրբեջանի դեմ միջպետական գանգատների ներկայացմանը, ինչպես նաև ընթացիկ միջպետական դատական և արբիտրաժային վարույթների շրջանակներում ՀՀ շահերի արդյունավետ պաշտպանությանը։ Վստահ եմ, որ Գրասենյակը կշարունակի պատշաճ և արդյունավետ կերպով իրականացնել Հայաստանի շահերի ներկայացումը միջազգային դատական և արբիտրաժային գործընթացների շրջանակներում»,- իր ֆեյսբուքյան էջում գրել էր նա։

Նշենք, որ Կիրակոսյանի հրաժարականի մասին լուրերն ավելի վաղ արդեն իսկ շրջանառվում էին։ Ըստ տեղեկությունների՝ Կիրակոսյանը համաձայն չէր իշխանության կողմից պարբերաբար բարձրաձայնվող՝ Ադրբեջանի դեմ միջազգային դատարաններ ներկայացված հայցերից հրաժարվելու դիրքորոշմանը։ Այս խոսակցությունները կողմերից որևէ մեկը չհերքեց կամ չհաստատեց։