Իրանում նոր պայթյուն է տեղի ունեցել. զոհ և վիրավորներ կան

Իրանի Սպահան քաղաքում պահեստում տեղի ունեցած պայթյունի հետևանքով 1 մարդ զոհվել է, ևս 2-ը՝ վիրավորվել։ Դեպքը տեղի է ունեցել տեղական ժամանակով 10:30-ին։ Տարածք են ուղարկվել փրկարարական խմբեր, հրշեջ մեքենաներ և անձնակազմ, գրում է Mehr գործակալությունը։

Դեպքի պատճառների վերաբերյալ դեռևս որևէ տեղեկություն չի հաղորդվում։

Աղբյուրների համաձայն՝ պայթյունը տեղի է ունեցել քիմիական արդյունաբերական համալիրում, որը կապված է վառոդի արտադրության հետ և վերահսկվում է Իրանի Ազգային անվտանգության խորհրդի կողմից:

Նմանատիպ տեղեկություն է հրապարակել Լոնդոնում գործող պարսկալեզու ընդդիմադիր «Iran International» լրատվականը: Ըստ աղբյուրի՝  «Ava Nar Parsian» ընկերությունը մասնագիտացած է «այրվող նյութերի» արտադրության մեջ։ Ընկերության կայքում նշվում է, որ այն արտադրում է հրավառության նյութեր և դինամիտ:

Լրատվամիջոցը նաև հայտնել է, որ «Ava Nar Parsian»-ի ղեկավարները կապված են անօդաչու թռչող սարքեր արտադրող մեկ այլ ընկերության հետ, որի գործարանում, որը նույնպես գտնվում է Սպահան նահանգում, 2021 թվականի հունիսին պայթյուն է տեղի ունեցել։

Հիշեցնենք, որ Իրանի ամենամեծ՝ Բանդար Աբբասի Շահիդ Ռաջա նավահանգստում շաբաթ օրը պայթյուն էր տեղի ունեցել, որի հետևանքով զոհերի թիվը հասել է 70-ի։

Ավելի վաղ The New York Times-ը, հղում անելով Իսլամական հեղափոխության պահապանների կորպուսի հետ կապված աղբյուրին, հաղորդել էր, որ նավահանգստում պայթել է նատրիումի պերքլորատը, որը բալիստիկ հրթիռների պինդ վառելիքի հիմնական բաղադրիչն է։

Թարգմանությունը՝ Էմմա Չոբանյանի