13.01.2026 | 16:17
Ադրբեջանի բանակի զորամասերից մեկում մարտավարական զորավարժություններ են անցկացվել
Արտուշ Գաբրիելյանն անձեռնմխելիությունից կզրկվի՞․ գերատեսչությունների արձագանքը
Հասարակություն
29.04.2025 | 15:16
Ժամեր առաջ Երևանի ընդհանուր իրավասության դատարանից բերման ենթարկված դատավոր Արտուշ Գաբրիելյանի գործի վերաբերյալ այս պահին որևէ գերատեսչություն պաշտոնական տեղեկություններ չի հրապարակում։ Ինչպես ավելի վաղ Factor TV-ի հետ զրույցում հայտնել էր Հակակոռուպցիոն կոմիտեն՝ քրեական վարույթի շրջանակներում այս պահին քննչական գործողություններ են ընթանում։
Factor TV-ն դիմեց Գլխավոր դատախազություն՝ պարզելու, դատավորին անձեռնմխելիությունից զրկելու և նրա նկատմամբ քրեական հետապնդում իրականացնելու միջնորդություն արդյո՞ք ներկայացվել է Բարձրագույն դատական խորհուրդ։ Գերատեսչությունը, սակայն, այս պահին չի մեկնաբանում իրավիճակը։ Նույն պատասխանը ստացանք նաև Խորհրդից․ մամուլի քարտուղար Ծովինար Խաչատրյանին հարցրինք՝ որևէ դատավորի մասով ստացե՞լ են միջնորդություն, պատասխանը նույնն էր՝ չեն մեկնաբանում։
Նշենք, ըստ ընթացակարգի՝ դատավորի նկատմամբ քրեական հետապնդում սկսելու համար Դատախազությունը պետք է միջնորդություն ներկայացնի ԲԴԽ, որտեղ այն քննվելուց և բավարարվելուց հետո միայն դատավորը կարող է զրկվել անձեռնմխելիությունից։
Հիշեցնենք՝ Բարձրագույն դատական խորհուրդը նախորդ տարվա հոկտեմբերին Գաբրիելյանին խիստ նկատողություն հայտարարեց։ Վարույթի հարուցման պատճառ է հանդիսացել դատախազի կողմից ներկայացված հաղորդումը, ըստ որի՝ ԱՄՆ իրավասու մարմինների կողմից հետախուզվող, ՀՀ-ում ձերբակալված ՌԴ քաղաքացի Օլեգ Լեբեդովին ժամանակավորապես կալանավորելու միջնորդություն է ներկայացվել դատարան։ Դատավորը ներգրավված է եղել նաև հերթապահության ցուցակում, գործը մակագրվել է նրան, և նախնական դատական նիստ նշանակվել է միայն առաջիկա երկուշաբթի օրը՝ ժամը 10։00-ին, թեև ժամը 16։00-ին ձերբակալման ժամկետն անցել է, ձերբակալված անձի նկատմամբ հսկողությունը վերացվել է, այդ ընթացքում պաշտպանը միջնորդել է, որ նիստն ընդմիջվի 15 րոպեով, դատավորը բավարարել է այն, ինչից հետո ձերբակալված անձը կարողացել է փախուստի դիմել դատական նիստից ու այլևս չի ներկայացել։
Արտուշ Գաբրիելյանը նաև առաջին դատավորն է, որն անցնում է ապօրինի ծագում ունեցող գույքի բռնագանձման գործով։
Ըստ Գլխավոր դատախազության՝ Գաբրիելյանից և նրան փոխկապակցված անձանցից հօգուտ Հայաստանի Հանրապետության պետք է բռնագանձել 5 անշարժ գույք, 4 տրանսպորտային միջոց, 1 իրավաբանական անձում մասնակցություն, 62 միլիոն 811 հազար դրամ և 1 բնակելի տան միջին շուկայական արժեքի չափով գումար:
Ռոզա Վարդանյան
