12.03.2026 | 23:22
Հարձակում Դեթրոյթի մոտ գտնվող սինագոգի վրա. հարձակվողը սպանվել է
Իրանի նավահանգստում պայթյունի հետևանքով զոհերի թիվը հասել է 40-ի, ավելի քան 1000 վիրավոր կա
Քաղաքականություն
28.04.2025 | 12:49
Իրանի ամենամեծ՝ Բանդար Աբբասի Շահիդ Ռաջա նավահանգստում տեղի ունեցած պայթյունի հետևանքով զոհերի թիվը հասել է 40-ի, վիրավորների թիվն ավելի քան 1000 է: Հորմոզգանի նահանգապետ Մոհամմադ Աշուրին հայտնել է, որ վիրավորներից 194-ը շարունակում են մնալ հիվանդանոցում, մյուսները դուրս են գրվել, գրում է IRNA գործակալությունը։
Ինը վիրավոր տեղափոխվել է Հորմոզգան նահանգից դուրս գտնվող հիվանդանոցներ՝ մասնագիտացված բուժման համար։
Իրանի Կարմիր մահիկի ընկերության մամուլի խոսնակը հայտնել է, որ նավահանգստում տեղի ունեցած պայթյունի հետևանքով վիրավորների թիվը հասել է 1242-ի։ Այս մասին էլ հայտնում է Mehr գործակալությունը։
Հորմոզգան նահանգի Շահիդ Ռաջա նավահանգստում հզոր պայթյունը տեղի է ունեցել ապրիլի 26-ին․ դեռևս չպարզված պատճառներով պայթել է վառելիքի ցիստեռնը։ Ներքին գործերի նախարար Էսկանդար Մոմենին կիրակի երեկոյան հայտնել է, որ միջադեպի պատճառը հետաքննվում է, ստեղծված հատուկ հանձնաժողովը պայթյունի հետ կապված ապացույցներ է հավաքում։
The New York Times-ը, հղում անելով Իսլամական հեղափոխության պահապանների կորպուսի հետ կապված աղբյուրին, հաղորդել էր, որ նավահանգստում պայթել է նատրիումի պերքլորատը, որը բալիստիկ հրթիռների պինդ վառելիքի հիմնական բաղադրիչն է։
Միջադեպի կապակցությամբ նախագահ Փեզեշքիանի կաբինետը երկուշաբթի ազգային սգո օր է հայտարարել։
Թարգմանությունը՝ Էմմա Չոբանյանի
