Քաղաքականություն
27.04.2025 | 10:58
Իրանի Շահիդ Ռաջայի նավահանգստում պայթել է նատրիումի պերքլորատը։ Այն բալիստիկ հրթիռների պինդ վառելիքի հիմնական բաղադրիչն է, հաղորդել է The New York Times-ը (NYT)՝ հղում անելով Իսլամական հեղափոխության պահապանների կորպուսի (IRGC) հետ կապված իր աղբյուրին։
«Նավահանգիստը մարտ ամսին ստացել է նատրիումի պերքլորատ պարունակող հրթիռային վառելիքի խմբաքանակ։ Ըստ տեղեկությունների՝ հրդեհը առաջացել է վառելիքի խմբաքանակի հետ անփույթ վարվելու պատճառով»,-փոխանցում է AP-ն։
The Financial Times (FT)-ը՝ հղում անելով երկու արևմտյան երկրների անվտանգության պաշտոնյաների հետախուզական տվյալներին, հայտնում է, որ նատրիումի պերքլորատն օգտագործվում է ամոնիումի պերքլորատ արտադրելու համար, որը կազմում է պինդ հրթիռային վառելիքի 70 տոկոսը։
Իրանը չի հաստատել բեռի ստացումը։ ՄԱԿ-ում Իրանի առաքելությունը չի արձագանքել AP-ի մեկնաբանության խնդրանքին։
Իրանի ՆԳՆ վերջին տվյալների համաձայն՝ պայթյունի հետևանքով զոհվել է 18 մարդ, մոտ 800-ը՝ վիրավորվել։ Իրանի առողջապահության նախարար Հոսեյն Քերմանպուրը հայտնել է, որ 357 հոսպիտալացվածներից 21-ը տեղափոխվել են վերակենդանացման բաժանմունք, իսկ հինգը ստացել են ծանր այրվածքներ։
Նավահանգստում բռնկված հրդեհը վերահսկողության տակ է վերցվել, սակայն այն շարունակում է մոլեգնել։ Բանդար Աբբաս նավահանգստային քաղաքի նահանգապետ Ահմադ Պույաֆարը հայտարարել է, որ դպրոցները փակ կլինեն ապրիլի 27-ին՝ օդի աղտոտվածության պատճառով։
Լուսանկարները՝ իրանական Tasnim News Agency-ի։
