Տոմետների որակի վերաբերյալ տեսանյութեր են պտտվել, որտե՞ղ են դրանք․ Ավինյանը դիմեց ենթականերին․ ՏԵՍԱՆՅՈՒԹ

«Ուզում եմ մի փոքր մեկնաբանություն ստանալ համացանցում տոմետների վերաբերյալ տարածված տեսանյութերի մասին՝ որտե՞ղ են դրանք, և ի՞նչ արձագանք ունենք դրանց հետ կապված»,- գործակարգավարական նիստին ասաց Երևանի քաղաքապետ Տիգրան Ավինյանը՝ դիմելով փոխքաղաքապետ Արմեն Փամբուխչյանին։

Վերջինս արձագանքեց. «Մեկը տեղի է ունեցել Աջափնյակում, մյուսը՝ Շենգավիթում։ Կխնդրեմ՝ վարչական շրջանի ղեկավարները մեկնաբանեն»։ Աջափնյակ վարչական շրջանի ղեկավարը տեղեկացրեց, որ տեսանյութում երևացող հատվածում 2020-2021 թվականներին կատարված աշխատանքներ են եղել, ոչ թե նախորդ տարվա։
Շենգավիթ վարչական շրջանի ղեկավարն էլ նշեց, որ աշխատանքները դարձյալ 2020-2021 թվականին են իրականացվել, և դրանք կատարել է ոչ թե Երևանի քաղաքապետարանը, այլ անհատ շինարարը՝ անվճար։ Նրա խոսքով՝ այն աշխատանքները, որտեղ որակի հետ կապված խնդիրներ են եղել, ավարտական ակտերը երբեք չեն ստորագրել։

Տիգրան Ավինյանը հորդորեց խիստ վերահսկողություն իրականացնել նաև այն աշխատանքների վերաբերյալ, որոնք անում են տնտեսվարողները՝ իրենց միջոցներով և ոչ համայնքի բյուջեից։

«Չկա այլևս մեր և ձեր աշխատանք։ Կա աշխատանք, որն արվում է Երևան քաղաքում և մայթի վրա, ու անկախ նրանից՝ մենք ենք վճարում, թե տնտեսվարողը, որակը պետք է համապատասխանի մեր ստանդարտներին»,- նշեց Տիգրան Ավինյանը։

Նշենք, որ տվյալ տեսանյութերը տարածել էր բլոգեր, ակտիվիստ Արթուր Չախոյանը։

Մանրամասները՝ տեսանյութում։