Հասարակությունը պետք է արդարադատության հարցում պատասխանատվություն զգա. ապաքաղաքական զրույց Հովհաննես Քոչարյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է փաստաբան, իրավական գիտությունների թեկնածու Հովհաննես Քոչարյանը: Նրա կարծիքով՝ օրենքները, որոնք ընդունվում են խորհրդարանների կողմից, պարտադիր պետք է հաշվի առնեն տվյալ հասարակության արժեհամակարգը, հակառակ դեպքում՝ չեն գործի:

Իսկ ինչպիսի՞ն է հայաստանյան հասարակության արժեհամակարգը: Պատասխանելով այս հարցին՝ հաղորդման հյուրը նշում է, որ հայաստանցիները, ընդհանուր առմամբ, ձգտում են եվրոպական արժեքներին, բայց մեր երկրում կա քաղաքակրթական մակարդակի հետ կապված խնդիր:

Ժողովրդավարական երկրում պետական համակարգի արդյունավետության առումով Հովհաննես Քոչարյանը կարևորում է հատկապես դատական համակարգի անկախությունը: Այդպիսի դատարանները կարողանում են զսպել գործադիր և օրենսդիր մարմինների հավակնությունները, որոնք զսպումների մեխանիզմի բացակայության պարագայում անպայման կդրսևորվեն՝ անկախ նրանից, թե ինչպես են ընտրվել այդ մարմինները:

Դատարանների անկախության ճանապարհներից մեկն է երդվյալների դատարաննների ստեղծումը: Ըստ իրավաբանի՝ այդպիսվ հասարակությունն իր վրա է վերցնում արդարադատության համար որոշակի պատասխանատվություն՝ մասնակցելով վիճահարույց քրեական գործերով վճիռների կայացմանը: Երդվյալների դատարանը կփոխի նաև դատախազների վարքագիծը: Այն դեպքերում, երբ դատարանում պարտության ռիսկը բարձր է, դատախազներն ավելի երկար են մտածում մեղադրական եզրակացությունը կազմելիս և ավելի շատ են հակված լինում նախադատական լուծումների:

Մանրամասները՝ տեսանյութում:

Արամ Աբրահամյան