Քաղաքականություն
17.04.2025 | 19:03
Խաղաղության համաձայնագրի տեքստի վրա աշխատանքը մարտին ավարտվել է, և Ադրբեջանը հնարավորություն է ունեցել ևս մեկ անգամ քննարկելու Հայաստանի հետ գործընթացի վերջնական ավարտի վերաբերյալ իր ակնկալիքները, հայտարարել է Ադրբեջանի ԱԳ նախարար Ջեյհուն Բայրամովը։
«Ես նշել եմ Հայաստանի Սահմանադրությամբ Ադրբեջանի նկատմամբ տարածքային պահանջների, ինչպես նաև Մինսկի խմբի վերացման անհրաժեշտությունը։ Սահմանազատման գործընթացն ընթացքի մեջ է, սակայն հաղորդակցությունների բացման հարցը դեռևս չլուծված է մնում։ Նշվել է նաև այն մասին, որ դեռևս չի ապահովվել Նախիջևան անարգել մուտքը»,- ասել է Բայրամովը Բաքվում Սլովենիայի արտաքին գործերի նախարար Տանյա Ֆայոնի հետ համատեղ մամուլի ասուլիսում։
Նա հավելել է, որ սահմանազատման գործընթացում պետական հանձնաժողովների միջև շփումները շարունակվում են, սպասվում է, որ այն կշարունակվի առաջիկա ամիսներին։
«Ադրբեջանը լավատեսորեն է տրամադրված այս գործընթացի նկատմամբ։ Մեկ այլ խնդիր է երկրների միջև հաղորդակցությունների բացումը։ Կա նաև Ադրբեջանի արևմտյան շրջանների և Նախիջևանի միջև անարգել հաղորդակցության թեման։ Այս հարցի շուրջ երկար ժամանակ ինտենսիվ բանակցություններ են ընթանում։ Դժբախտաբար, մինչ օրս գործնական արդյունքներ չեն գրանցվել։ Հաղորդակցության ապաշրջափակումից բացի՝ Ադրբեջանը պահանջում է հատուկ մոտեցում արևմտյան շրջանների և Նախիջևանի միջև հաղորդակցություն հաստատելու հարցում։ Որովհետև չկա այնպիսի բան, որ մեկ երկիրը բաժանվի երկու մասի։ 2020 թվականին Հայաստանը պարտավորություն է ստանձնել անխոչընդոտ հաղորդակցության հետ կապված, և այդ պարտավորությունը պետք է կատարվի։ Դա պետք է լինի այնպիսի պարտավորություն, որ ապագայում Հայաստանի օրենսդրությունում փոփոխությունները չկարողանան փոխել այս իրավիճակը ո՛չ կարճաժամկետ, ո՛չ երկարաժամկետ, ո՛չ էլ միջնաժամկետ հեռանկարում»,- ասել է Ադրբեջանի ԱԳ նախարարը՝ նշելով, թե Ադրբեջանի համար Նախիջևանի հետ հաղորդակցությունը պետք է լինի անարգել, չպետք է որևէ խոչընդոտ լինի։
Թարգմանությունը՝ Էմմա Չոբանյանի
