Քաղաքականություն
16.04.2025 | 20:14
Ադրբեջանի պաշտպանության նախարար Զաքիր Հասանովն ընդունել է Թուրքիայի Ազգային Մեծ ժողովի պատգամավոր, պաշտպանության խորհրդարանական հանձնաժողովի նախագահ, պաշտպանության նախկին նախարար Հուլուսի Աքարի գլխավորած պատվիրակությանը:
Հասանովը նշել է, որ ուրախ է թուրք հյուրերին Ադրբեջանում տեսնելու համար։ Նա շեշտել է, որ «երկու եղբայրական երկրների պետությունների ղեկավարների միջև անկեղծ հարաբերությունները հատուկ դեր են խաղում բոլոր ոլորտների, այդ թվում՝ Ադրբեջանի և Թուրքիայի միջև ռազմական համագործակցության զարգացման գործում»։
Աքարը, իր հերթին, գոհունակություն է հայտնել այս տարի Ադրբեջան կատարած իր առաջին այցի կապակցությամբ և շնորհակալություն է հայտնել ջերմ ընդունելության և հյուրընկալության համար։ Նշելով փոխադարձ այցելությունների կարևորությունը՝ նա ընդգծել է, որ Ադրբեջանի և Թուրքիայի միջև ռազմական կապերը, որոնք հասել են ռազմավարական դաշինակցության մակարդակի, անընդհատ զարգանում են։
Հանդիպմանը լայնորեն քննարկվել են փոխադարձ հետաքրքրություն ներկայացնող հարցեր, այդ թվում՝ տարածաշրջանային անվտանգության հարցերը։
Հիշեցնենք, որ նախօրեին էլ Աքարը ՀՀ-ին կոչ էր արել «խելքի գալ, գիտակցել իրականությունը և հնարավորինս շուտ սեղմել Ադրբեջանի մեկնած ձեռքը»՝ նկատի ունենալով խաղաղության համաձայնագրի ստորագրումը։
Թարգմանությունը՝ Էմմա Չոբանյանի
