17.07.2026 | 12:44
Հունիսի 22-ից ի վեր ԱՄՆ-ի հարվածների հետևանքով Իրանում զոհվել է 38 մարդ, ավելի քան 400-ը՝ վիրավորվել
Թուրքիայի պաշտպանության նախկին նախարարը ՀՀ-ին կոչ է արել «խելքի գալ»
Քաղաքականություն
15.04.2025 | 21:28
Ադրբեջանի և Հայաստանի միջև խաղաղության համաձայնագրի ստորագրումը համապատասխանում է տարածաշրջանի բոլոր երկրների շահերին։ Այս մասին Ադրբեջանի Միլլի Մեջլիսում հայտարարել է Թուրքիայի խորհրդարանի պաշտպանության հանձնաժողովի նախագահ, պաշտպանության նախկին նախարար Հուլուսի Աքարը Թյուրքական պետությունների խորհրդարանական վեհաժողովի պաշտպանության հանձնաժողովների նախագահների երկրորդ նիստում, գրում են ադրբեջանական լրատվամիջոցները։
Աքարը հայտարարել է, թե «Հայաստանը գրեթե 30 տարի օկուպացրել է Ադրբեջանի տարածքները»։
«Ամբողջ աշխարհը լռել է այս հանցագործությունների մասին։ Սա ևս մեկ անգամ ապացուցում է, որ թյուրքական պետություններն իրենցից բացի այլ ընկերներ չունեն։ Մենք պետք է ամրապնդենք մեր միասնությունը»,- նշել է նա՝ հավելելով, որ այժմ օրակարգում է Ադրբեջանի և Հայաստանի միջև խաղաղության պայմանագրի ստորագրումը։
«Խաղաղության համաձայնագիրը շահավետ կլինի Հարավային Կովկասի բոլոր երկրների համար։ Թուրքիան աջակցում է քայլերին, որոնք ձեռնարկվում են այդ ուղղությամբ»,- ասել է Թուրքիայի նախկին ՊՆ ղեկավարը։
Նա նաև նշել է, որ պաշտպանության և անվտանգության ապահովումը, ինչպես նաև նոր պաշտպանական հայեցակարգերի մշակումը մեծ նշանակություն ունեն գլոբալ աշխարհում։
«Խնդիրները պետք է կանխվեն։ Ազգային անվտանգությունը կախված է ուժեղ բանակից։ Ադրբեջանի հաղթանակը Ղարաբաղում դրա ապացույցն է և հպարտության աղբյուր ամբողջ թյուրքական աշխարհի համար։ Մենք պետք է աշխատենք համատեղ և օգտագործենք արհեստական բանականության ուժն այս ուղղությամբ։ Կարևոր է թյուրքական աշխարհի երկրների միջև միասնական պաշտպանական մեխանիզմ ձևավորել»,- հայտարարել է Աքարը։ Բացի այդ՝ նա լրագրողներին ասել է, թե «Հայաստանը պետք է խելքի գա, և դա առաջին բանն է, որ պետք է արվի»։
«Շուշիում ծածանվում է Ադրբեջանի եռագույն դրոշը։ Հայաստանը պետք է առաջիկայում գիտակցի իրականությունը և ընդունի այս փաստերը, ինչպես նաև հնարավորինս շուտ սեղմի Ադրբեջանի մեկնած ձեռքը։ Առաջիկայում պետք է ստորագրվի խաղաղության համաձայնագիրը, տարածաշրջանում պետք է խաղաղություն հաստատվի։ Դա մեր նպատակն է։ Ադրբեջանի հետ սահմանին Հայաստանի կողմից հրադադարի խախտման դեպքերն ապարդյուն ջանքեր են։ Դա ոչնչի չի հանգեցնի»,-ասել է Աքարը։
Նշենք, որ շաբաթներ շարունակ ՀՀ ՊՆ-ն հերքումներով է հանդես գալիս՝ արձագանքելով ադրբեջանական կողմի ապատեղեկատվությանը, թե, իբր, հայկական կողմը կրակոցներ է արձակում սահմանային հատվածներում։ Հիշեցնենք, որ Հայաստանի Հանրապետության վարչապետի աշխատակազմն առաջարկել է հրադադարի ռեժիմի խախտման դեպքերի և/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծել, ինչին մինչև օրս Ադրբեջանը չի արձագանքել։
Հուլուսի Աքարը անդրադարձել է նաև Ադրբեջանի և Թուրքիայի միջև պաշտպանական համագործակցությանը։
«Մենք մեկ ազգ ենք և մեկ բանակ։ Միասնական բանակի ստեղծման գործընթացը ներկայումս ընթացքի մեջ է։ Ադրբեջանն ու Թուրքիան պետք է համագործակցեն պաշտպանության ոլորտում։ Դրա պայմանը համատեղ զորավարժություններն են»,- հայտարարել է Թուրքիայի նախկին ՊՆ ղեկավարը։
Թարգմանությունը՝ Էմմա Չոբանյանի
