09.10.2026 | 20:10
Ժանտախտ․ ինչպես է փոխանցվում, որքանով է վտանգավոր և արդյոք բուժում կա․ զրույց մասնագետի հետ. ՏԵՍԱՆՅՈՒԹ
ԱՄՆ-ն մեղմացրել է Ուկրաինայի նկատմամբ պահանջները՝ Կիևին հատկացված ռազմական օգնության միջոցների վերադարձի վերաբերյալ․ Bloomberg
Քաղաքականություն
16.04.2025 | 12:34
ԱՄՆ-ն, ըստ երևույթին, մեղամացրել է Ուկրաինայի նկատմամբ պահանջները գումարների վերադարձի վերաբերյալ, որոնք հատկացվել են Կիևին ռազմական օգնության շրջանակներում։ Այս մասին հայտնում է Bloomberg-ը՝ վկայակոչելով իրազեկ աղբյուրներին, գրում է BBC-ի ռուսական ծառայությունը։
Հազվագյուտ մետաղների գործարքի վերաբերյալ բանակցությունների վերջին փուլից հետո, որը տեղի է ունեցել անցյալ շաբաթվա վերջին Վաշինգտոնում, ԱՄՆ նախագահ Դոնալդ Թրամփի վարչակազմը փոխել է լայնածավալ պատերազմի սկսվելուց ի վեր օգնության չափի իր գնահատականը։ Լրատվամիջոցը նշում է, որ եթե նախկինում խոսքը 300 միլիարդ դոլարի մասին էր, ապա այժմ ԱՄՆ-ն օգնության չափը գնահատում է 100 միլիարդ դոլար։ Այն շատ ավելի մոտ է Ուկրաինայի սեփական գնահատականին՝ 90 միլիարդին։ Կիևն ու Վաշինգտոնը պաշտոնապես չեն մեկնաբանել այս տեղեկությունը։
ԱՄՆ ֆինանսների նախարար Սքոթ Բեսենթը, պատասխանելով Bloomberg-ի՝ բանակցությունների վերաբերյալ հարցին, ասել է, որ կողմերը «շատ մոտ են» համաձայնության։ «(Համաձայնագիրը) կարող է ստորագրվել արդեն այս շաբաթ», – ասել է նա։
Bloomberg-ի աղբյուրը հայտնել է, որ Կիևի և Վաշինգտոնի միջև բանակցությունները արդյունավետ են եղել։ Սակայն, համաձայնագրի վերջին նախագծում ԱՄՆ-ն դեռևս գործարքը դիտարկում է որպես Ուկրաինայի կողմից պարտքի վճարում՝ առանց նշելու ճշգրիտ գումարը։
Հավելենք, որ ԱՄՆ-ն ցանկանում է հասանելիություն ստանալ ուկրաինական հանքերին։ Համաձայնագիրը, որը վերաբերում էր հազվագյուտ մետաղական հանքավայրերին, նախատեսված էր կնքել փետրվարի վերջին։ Ուկրաինայի նախագահ Վլադիմիր Զելենսկիի գլխավորած պատվիրակությունը փետրվարի 28-ին ժամանել էր Վաշինգտոն՝ համաձայնագիրը ստորագրելու համար։ Սակայն, Սպիտակ տանը Զելենսկիի, ԱՄՆ նախագահ Դոնալդ Թրամփի և փոխնախագահ Ջեյ Դի Վենսի միջև տեղի ունեցած վեճից հետո համաձայնագրի ստորագրումը հետաձգվել է։ Մարտի վերջին հայտնի էր դարձել, որ Միացյալ Նահանգները պատրաստել է համաձայնագրի նոր տարբերակը, որտեղ արդեն քննարկվում էր Ուկրաինայի բոլոր օգտակար հանածոներին հասանելիությունը։ Ուկրաինայի իշխանությունները հայտարարել են, որ դա տարբերակներից միայն մեկն է, և որ համաձայնագրի քննարկումները շարունակվում են։
Թարգմանությունը՝ Էմմա Չոբանյանի
