07.10.2026 | 15:10
ՀՀ-ում հրթիռների արտադրության հարցի քննարկում Դելիի հետ՝ ըստ ԶԼՄ-ի // Երևանում փակ փողոցներ կլինեն․ ԼՈՒՐԵՐ
Զելենսկին ժամանել է Անկարա․ սպասվում է նրա հանդիպումը Էրդողանի հետ․ ՏԵՍԱՆՅՈՒԹ
Քաղաքականություն
15.05.2025 | 14:23
Ուկրաինայի նախագահ Վլադիմիր Զելենսկին ժամանել է Անկարա՝ Թուրքիայի նախագահ Ռեջեփ Թայիփ Էրդողանի հետ հանդիպելու։ TRT Haber-ի հաղորդմամբ՝ Զելենսկիին տեղափոխող ինքնաթիռը Անկարայի օդանավակայանում վայրէջք է կատարել ժամը 12։14-ին։
Զելենսկիին օդանավակայանում դիմավորել են Ուկրաինայի արտաքին գործերի նախարար Անդրեյ Սիբիհան և պաշտոնյաներ, որոնք այսօր առավոտյան ժամանել են Անթալիա՝ ՆԱՏՕ-ի արտաքին գործերի նախարարների ոչ պաշտոնական հանդիպմանը մասնակցելու համար։
Զելենսկին այսօր Անկարայի նախագահական համալիրում հանդիպում կունենա նախագահ Ռեջեփ Թայիփ Էրդողանի հետ։
«Տեսնենք, թե ռուսներն ինչ մակարդակով են։ Մեր տեսածով՝ ավելի շատ նման է բուտաֆորիկ մակարդակի»,- ասել է նա։
Զելենսկին հայտարարել է, որ Էրդողանի հետ զրույցից հետո պարզ կլինեն Ուկրաինայի հաջորդ քայլերը։ Նրա խոսքով՝ հանդիպումը կարող է տևել մի քանի ժամ։ Նա նաև ընդգծել է, որ ուկրաինական պատվիրակության կազմում են արտաքին գործերի նախարարության, նախագահի աշխատակազմի, զինվորականների և բոլոր տեսակի հետախուզության ներկայացուցիչներ՝ «ակնկալվող արդար խաղաղության ուղղությամբ ցանկացած որոշում կայացնելու համար»։
Հիշեցնենք, որ Ռուսաստանի և Ուկրաինայի միջև ուղիղ բանակցություններ են սպասվում մայիսի 15-ին թուրքական Ստամբուլում։ Վլադիմիր Զելենսկին հայտարարել էր, որ պատրաստ է հանդիպել ՌԴ նախագահ Վլադիմիր Պուտինի հետ։ Սակայն Ռուսաստանի նախագահը չի մեկնի Թուրքիա։ Մայիսի 14-ի ուշ երեկոյան Պուտինը հրամանագիր է ստորագրել, որի համաձայն՝ ռուսական պատվիրակությունը կգլխավորի իր օգնական Վլադիմիր Մեդինսկին։
Թարգմանությունը՝ Էմմա Չոբանյանի
