21.12.2025 | 22:02
Ֆուտզալի Հայաստանի հավաքականը հաղթեց Մոլդովային
ԱՄՆ-ը հաստատել է Թուրքիային 304 միլիոն դոլարի հրթիռների հնարավոր վաճառքը
Քաղաքականություն
15.05.2025 | 15:32
ԱՄՆ Պետքարտուղարությունը հաստատել է Թուրքիային հրթիռների և դրանց հետ կապված սարքավորումների հնարավոր վաճառքը՝ 304.1 միլիոն դոլար ընդանուր արժողությամբ: Այս մասին հայտարարել է Պենտագոնը, գրում է Turkiye today-ը:
Գործարքը ներառում է 53 AIM-120C-8 միջին հեռահարության օդ-օդ դասի հրթիռներ (AMRAAM) և վեց AMRAAM ուղղորդող սարքեր, որոնց արժեքը կազմում է մոտավորապես 225 միլիոն դոլար: Այս հրթիռները հիմնականում օգտագործվում են օդային մարտերում և համատեղելի են F-16 կործանիչների հետ, որոնք կազմում են Թուրքիայի ռազմաօդային ուժերի հիմնական բաղադրիչը: Բացի այդ, Պետքարտուղարությունը հաստատել է 60 AIM-9X Sidewinder Block II հրթիռների, 11 AIM-9X մարտավարական ուղղորդման միավորների, ինչպես նաև տարբեր լոգիստիկ և ծրագրային աջակցության ծառայությունների վաճառքը: Գործարքի այս մասը գնահատվում է 79,1 միլիոն դոլար:
«Այս առաջարկվող վաճառքը Թուրքիային կապահովի կարևորագույն օդային պաշտպանության հնարավորություններով՝ իր հայրենիքը և այնտեղ տեղակայված ԱՄՆ անձնակազմը պաշտպանելու համար»,- ասվում է Պենտագոնի հայտարարության մեջ։
Առաջարկվող գործարքը ներկայացվել է ԱՄՆ Կոնգրեսին, որն ունի 15 օր՝ ցանկացած առարկություն ներկայացնելու համար։ Եթե այդ ժամանակահատվածում առարկություններ չներկայացվեն, վաճառքը կընթանա ըստ նախատեսվածի։ Արիզոնայում գտնվող RTX Corporation-ը կլինի գլխավոր կապալառուն։
Պաշտպանության անվտանգության համագործակցության գործակալությունը չորեքշաբթի տրամադրել է անհրաժեշտ հավաստագիրը՝ Կոնգրեսին տեղեկացնելով հնարավոր վաճառքի մասին։
Raytheon-ի կողմից արտադրված AIM-9X Sidewinder Block II-ն աշխարհի ամենաժամանակակից կարճ հեռահարության ինֆրակարմիր ուղղորդվող հրթիռներից մեկն է։ Այն կարող է տեղակայվել օդ-օդ, օդ-մակերես և մակերես-օդ դասավորություններում՝ առանց որևէ փոփոխության։
Հրթիռը 3 մետր երկարություն ունի, կշռում է 85 կիլոգրամ և կրում է 9,3 կիլոգրամանոց բեկորային մարտագլխիկ։ Արդյունավետ կրակի հեռավորությունը մոտ 30 կիլոմետր է։
Թարգմանությունը՝ Էմմա Չոբանյանի
