Քաղաքականություն
15.04.2025 | 20:29
«Մենք ո՛չ չափազանց լավատես ենք, ո՛չ էլ չափազանց հոռետես այս բանակցությունների հարցում»,- այս մասին հայտարարել է Իրանի գերագույն հոգևոր առաջնորդ Ալի Խամենեին՝ անդրադառնալով շաբաթ օրը Օմանում կայացած Թեհրանի և Վաշինգտոնի միջև անուղղակի բանակցությունների առաջին փուլին,- գրում է Mehr գործակալությունը։
Իսլամական հեղափոխության առաջնորդն ասել է, որ երկրի խնդիրները չպետք է կապվեն բանակցությունների հետ։
«Մենք ո՛չ չափազանց լավատես ենք, ո՛չ էլ չափազանց հոռետես այս բանակցությունների հարցում»,- հայտարարել է նա՝ նշելով, որ դա որոշում է և քայլ, որը ձեռնարկվել և լավ է իրականացվել առաջին փուլերում։
«Իհարկե, մենք շատ հոռետեսորեն ենք տրամադրված մյուս կողմի նկատմամբ, բայց լավատեսորեն ենք տրամադրված մեր սեփական հնարավորությունների նկատմամբ»,-ասել է Խամենեին։
Ալի Խամենեին ասել է, որ Միացյալ Նահանգների հետ ներկայիս բանակցությունների առաջին քայլերը բավարար են ընթացել։ Նա կոչ է արել պաշտոնյաներին շարունակել բանակցությունները նմանատիպ զգուշությամբ։
Հիշեցնենք, որ առաջին փուլի բանակցությունները ԱՄՆ-ի ու Իրանի միջև տեղի էին ունեցել ապրիլի 12-ին։ Իրանական կողմից բանակցել արտաքին գործերի նախարար Աբբաս Արաղչին, իսկ ամերիկյանից՝ նախագահ Դոնալդ Թրամփի հատուկ բանագնաց Սթիվ Ուիթքոֆը։
Այսօր ավելի վաղ էլ Իրանի ԱԳՆ-ն հայտնել էր, որ ԱՄՆ-ի հետ բանակցությունների հաջորդ փուլը տեղի կունենա Օմանում ապրիլի 19-ին։
Թարգմանությունը՝ Էմմա Չոբանյանի
