08.09.2026 | 21:50
Գագիկ Խաչատրյանի միլիարդները մի բանակի ունեցվածք է․ ՀՀ-ի դեմ մեծ հանցագործություն է տեղի ունեցել․ Գուրգեն Սիմոնյան. ՏԵՍԱՆՅՈՒԹ
Ֆրանսիայում մեկնարկել է «Հայաստանի օրեր․ մշակութային ճամփորդություն դեպի Հայաստան» խորագիրը կրող միջոցառումների շարքը
Մշակույթ
09.04.2025 | 13:04
Ապրիլի 7-ին Ֆրանսիայի Շարանտոն-լը-Պոն քաղաքում մեկնարկել է «Հայաստանի օրեր․ մշակութային ճամփորդություն դեպի Հայաստան» խորագիրը կրող երկշաբաթյա միջոցառումների շարքը։ Նույն օրը երեկոյան տեղի է ունեցել միջոցառումների մեկնարկի հանդիսավոր արարողություն, որի ընթացքում ելույթներով են հանդես եկել Շարանտոն-լը-Պոնի քաղաքապետ Էրվե Գիքելը, Ֆրանսիայում ՀՀ դեսպանության երրորդ քարտուղար Շիրազ Հովակիմյանը և միջոցառումների կազմակերպման նախաձեռնության հեղինակ «ARTMONDIA» կազմակերպության նախագահ Անուշ Դուրյան-Ջրբաշյանը. տեղեկացնում են Ֆրանսիայում ՀՀ դեսպանությունից։
Իր ելույթում Շիրազ Հովակիմյանը շնորհակալություն է հայտնել քաղաքապետ Գիքելին նախաձեռնության կյանքի կոչմանը ցուցաբերած համակողմանի աջակցության և այդ ձևով նաև Հայաստանին ու հայ ժողովրդին աջակցության և բարեկամության ուղերձ հղելու համար։ Նա ընդգծել է, որ համեմատաբար փոքրաթիվ հայկական համայնք ունեցող Շարանտոն-լը-Պոնում Հայաստանին նվիրված օրերի անցկացումը Հայաստանի ու Ֆրանսիայի միջև առկա առանձնահատուկ հարաբերությունների և ընդհանուր արժեքների վրա հիմնված այդ բարեկամության ակնառու դրսևորումներից է։
Բացման պաշտոնական մասին հաջորդել է ֆրանսահայ երգիչ և դուդուկահար Լևոն Խոզյանի, Մարսելի կոնսերվատորիայի դասախոս, դաշնակահար Ժան-Ժակ Բեդիկյանի և պարուհի Շուշան Ագուջյանի մատուցմամբ համերգ-ներկայացումը։
Ծանոթություն․ «Հայաստանի օրեր․ մշակութային ճամփորդություն դեպի Հայաստան» միջոցառումների ընթացքում այցելուներին են ներկայացվելու հայկական գորգագործության, երաժշտական ու պարային արվեստները, հայկական խոհանոցը, տեղի են ունենալու Հայաստանին նվիրված գրքերի շնորհանդեսներ։
