Թրամփը Նեթանյահուին առաջարկել է միջնորդ լինել Թուրքիայի և Իսրայելի միջև

ԱՄՆ նախագահ Դոնալդ Թրամփը գովաբանել է Թուրքիայի նախագահ Ռեջեփ Թայիփ Էրդողանին՝ նրան անվանեելով «շատ խելացի»։ Սպիտակ տանը Իսրայելի վարչապետ Բենիամին Նեթանյահուի հետ հանդիպման ժամանակ նա նաև առաջարկել է միջնորդ լինել Իսրայելի և Թուրքիայի միջև, գրում է Axios-ը։

Նեթանյահուի հետ ճեպազրույցի ժամանակ Թրամփին հարցրել են Սիրիայում Թուրքիայի ազդեցության և դրա դեմ Իսրայելի առարկություններից, քանի որ իսրայելական ուժերը վերջին օրերին հարվածներ են հասցնում սիրիական օբյեկտներին և Թուրքիային մեղադրում Ասադի ռեժիմի տապալումից հետո երկրում «բացասական դեր» խաղալու մեջ։

«Ես շատ լավ հարաբերություններ ունեմ Թուրքիայի և նրա առաջնորդի հետ։ Կարծում եմ, որ մենք կկարողանանք լուծել դա։ Ուստի, ես հուսում եմ, որ խնդիր չի լինի։ Եթե խնդիր ունեք Թուրքիայի հետ, ես իսկապես կարծում եմ՝ կկարողանաք լուծել այն։ Այսինքն՝ քանի դեռ ողջամիտ եք։ Մենք պետք է ողջամիտ լինենք»,- ասել է Թրամփը։

ԱՄՆ նախագահն ընդգծել է, որ «հիանալի հարաբերություններ» ունի Էրդողանի հետ՝ նրան բնութագրելով «կոշտ տղա» և  «շատ խելացի»: Ըստ Թրամփի՝ «հենց Թուրքիան» է կազմակերպել անցյալ դեկտեմբերին Սիրիայի երկարամյա նախագահ Բաշար Ասադի տապալումը:

«Ես ասացի՝ «Շնորհավորում եմ, դուք արել եք այն, ինչ ոչ ոք չի կարողացել անել 2000 տարվա ընթացքում: Դուք գրավել եք Սիրիան տարբեր անուններով, բայց նույն բանով: Դուք վերցրել եք այն»,- ասել է Թրամփը։

Հավելենք, որ Իսրայելն արշավ է իրականացնում՝ ոչնչացնելու Սիրիայի ռազմական հնարավորությունները, որպեսզի դրանք չկարողանան սպառնալ։ Թել Ավիվը մտավախություն ունի, որ եթե Թուրքիան ռազմական ներկայություն հաստատի Սիրիայում, դա կարող է սահմանափակել իսրայելական օդուժի գործողությունների ազատությունը տարածաշրջանում:

Հիշեցնենք, որ Թուրքիան քայլեր է ձեռնարկում՝ վերահսկողության տակ առնելու Սիրիայի T4 ռազմավարական ավիաբազան և պատրաստվում է այնտեղ ՀՕՊ համակարգեր տեղակայել։

Թարգմանությունը՝ Էմմա Չոբանյանի