05.04.2026 | 17:21
Կալինինգրադում առևտրի կենտրոնում բռնկված հրդեհի տարածքը հասել է 1000 քառակուսի մետրի
Կայացել է Ատոմ Էգոյանի «Արարատ» կինոֆիլմի երաժշտության հայաստանյան պրեմիերան. ամփոփվել է Պենդերեցկու անվան ժամանակակից երաժշտության 5-րդ փառատոնը
Մշակույթ
07.04.2025 | 11:29
Պենդերեցկու անվան ժամանակակից երաժշտության 5-րդ փառատոնի փակման համերգին տեղի ունեցավ Ատոմ Էգոյանի «Արարատ» կինոֆիլմի երաժշտության հայաստանյան պրեմիերան՝ Հայաստանի պետական սիմֆոնիկ նվագախմբի, Հայաստանի ազգային ակադեմիական երգչախմբի կատարմամբ և դիրիժոր Սերգեյ Սմբատյանի ղեկավարմամբ։ Սյուիտը «Արարատ» կինոֆիլմի երաժշտությունից հեղինակել է կոմպոզիտոր Մայքլ Դաննան։ «Արարատ» կինոֆիլմի երաժշտությունը հայկական շարականների ու ժողովրդական երաժշտության միաձուլում է, որը հուզել է տասնյակ հազարավոր մարդկանց ամբողջ աշխարհում։ Երաժշտության հեղինակ, օսկարակիր կոմպոզիտոր Մայքլ Դաննան ստեղծագործության մեջ օգտագործել է հայ ժողովրդական «Կռունկ» և «Երազ» երգերը, «Ուր ես, մայր իմ» շարականը․ տեղեկացնում են Հայաստանի պետական սիմֆոնիկ նվագախմբի լրատվական ծառայությունից։
Համերգի ընթացքում հնչել է նաև անվանի վրացի կոմպոզիտոր Գիյա Կանչելիի «Styx» ալտի, խառը երգչախմբի և նվագախմբի համար։ Մենակատար՝ ալտահար Սառա ՄըքԷլրավի։ Ալտահարը նշում է, որ ստեղծագործությունն առասպելական Ստիքս գետի մասին է, որը բաժանում է կյանքը մահից։ Եվ ըստ նրա՝ ալտն այստեղ հանդես է գալիս որպես այս 2 աշխարհների միջև ուղեկից։ «Սա աներևակայելի լիրիկական, հոգևոր և իսկապես տպավորիչ ստեղծագործություն է»,- ասում է Սառա ՄըքԷլրավին։ Նշենք, որ Ալտահար Սառա ՄըքԷլրավին համերգի ընթացքում որպես բիս կատարեց Կոմիտասի «Շողեր ջանը»:
Երեկոյի ընթացքում հնչել է նաև լեհ կոմպոզիտոր Քշիշտոֆ Պենդերեցկու «Երեք պիես հին ոճում» ստեղծագործությունը՝ գրված լարային նվագախմբի համար։
Պենդերեցկու անվան ժամանակակից երաժշտության փառատոնն այս տարի իրականացվում էր ՀՀ-ում Լեհաստանի դեսպանության աջակցությամբ։
Փառատոնը եզակի հնարավորություն է ճանաչելու ու գնահատելու մեր ժամանակների հեղինակավոր կոմպոզիտորներին ու նրանց ստեղծագործությունները
