Քաղաքականություն
03.10.2018 | 15:42
Եվրոպայի խորհրդի խորհրդարանական վեհաժողովի Հայաստանի դիտորդական հարցով համազեկուցող Յուլյա Լովոչկինան (Ուկրաինա) այսօր կոչ է արել Հայաստանի բոլոր քաղաքական ուժերին հարգել ժողովրդավարական սկզբունքները և օրենքի գերակայությունը թե՛ խոսքով, թե՛ գործով: Այդ մասին ասված է ԵԽԽՎ կայքում՝ assembly.coe.int-ում հրապարակված հայտարարությունում:
«Երևանի քաղաքապետի ընտրությունները հստակորեն ցույց տվեցին հայ ժողովրդի ժողովրդավարական ձգտումները: Միաժամանակ, մասնակցության ցուցանիշը ցույց տվեց, որ քաղաքական գործընթացների նկատմամբ հանրային վստահությունը դեռևս ցածր է: Հետևաբար, կարևոր է, որ հաջորդ խորհրդարանական ընտրությունները բոլոր քաղաքական մրցակիցների և շահագրգիռ կողմերի կողմից ընկալվեն և ընդունվեն որպես ժողովրդավարական և արդար: Մենք կոչ ենք անում իշխանություններին և քաղաքական բոլոր շահագրգիռ կողմերին երաշխավորել, որ արտահերթ ընտրությունները կանցկացվեն եվրոպական չափանիշներին և ժողովրդավարական ընտրությունների համար անհրաժեշտ նորմերին համապատասխան և որ բոլոր քաղաքական ուժերը կունենան պատշաճ և բավականաչափ ժամանակ ընտրություններին պատրաստվելու համար: Եվ հատկապես կարևոր է, որ փոփոխվի Ընտրական օրենսգիրքը, ինչպես կոչ են արել որոշ քաղաքական շահագրգիռ կողմեր: Ցանկացած փոփոխություն պետք է լիարժեքորեն հարգի Վենետիկի հանձնաժողովի ցուցումները, ներառյալ՝ ընտրական օրենսդրության կայունության առնչությամբ, և հիմնված լինի բոլոր քաղաքական ուժերի միջև հնարավորինս առավելագույն կոնսենսուսի վրա»,- ասել է Լովոչկինան:
Նա ընդգծել է, որ պատշաճ խորհրդակցությունների և կոնսենսուսի համար բավականաչափ ժամանակի անհրաժեշտությունը խիստ կարևոր է հնարավոր սահմանադրական ցանկացած փոփոխության համատեքստում, և որ այն չպետք է հապճեպ իրականացվի:
Անդրադառնալով Հայաստանում վերջին զարգացումներին, որոնք մեծացրել են երկրի քաղաքական միջավայրում լարվածությունը և հանգեցրել քաղաքական հետապնդումներ և քաղաքական շարժառիթներով քրեական հետաքննություններ սկսելու մասին մեղադրանքների, Լովոչկինան նշել է, որ ԵԽԽՎ-ն բազմիցս ողջունել է Հայաստանում խաղաղ և ժողովրդավարական իշխանափոխությունը, այդ թվում՝ իշխանությունների հավաստիացումները ժողովրդավարական սկզբունքները հարգելու և դատական համակարգում քաղաքական միջամտությունների անընդունելիության մասին. «Մենք ողջունել ենք Հայաստանի խաղաղ ու ժողովրդավար իշխանափոխությունը ու իշխանությունների հավաստիացումները, որ դատական համակարգը քաղաքական միջամտությունից ազատ է գործելու և քաղաքական վրեժխնդրություններ չեն լինելու: Ես ընդգծում եմ, որ չի կարող լինել անպատժելիություն քրեական գործողությունների համար՝ անկախ, թե ով է դա իրագործել: Մենք, հետևաբար, ողջունում ենք 2008 թվականի մարտյան ողբերգական դեպքերի ժամանակ գրանցված 10 զոհերի վերաբերյալ ցանկացած արժանահավատ քննություն: Այնուամենայնիվ, ցանկացած հետաքննություն, այդ թվում՝ կոռուպցիոն մեղադրանքների վերաբերյալ հետաքննությունները, պետք է իրականացվեն օրենքի գերակայության, դատական անկախության և արդար դատավարության սկզբունքների պահպանմամբ՝ համաձայն Մարդու իրավունքների եվրոպական կոնվենցիայի»:
Համազեկուցողները դիտորդական հանձնաժողովի խնդրանքով մոտ ապագայում կայցելեն Հայաստան՝ քննարկելու վերջին զարգացումները բոլոր շահագրգիռ կողմերի հետ:
