25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
«Շաբաթների ընթացքում կիմանանք՝ արդյո՞ք ՌԴ-ն տրամադրված է խաղաղության»․ ԱՄՆ պետքարտուղար
Քաղաքականություն
04.04.2025 | 18:27
ԱՄՆ պետքարտուղար Մարկո Ռուբիոն հայտարարել է, որ Սպիտակ տան վարչակազմն առաջիկա շաբաթների ընթացքում կստանա հարցի պատասխանը՝ արդյո՞ք Ռուսաստանը տրամադրված է Ուկրաինայում խաղաղության հաստատման, գրում է BBC-ի ռուսական ծառայությունը։
Նրա խոսքով՝ Վաշինգտոնն իր կարծիքն այս հարցի շուրջ կձևավորի «շաբաթների, ոչ թե ամիսների ընթացքում»։
«Ռուսները գիտեն մեր դիրքորոշումը պատերազմի ավարտի վերաբերյալ: Եվ նրանց պատասխաններից մենք շատ շուտով կիմանանք՝ արդյո՞ք նրանք լուրջ են տրամադրված իրական խաղաղության հարցում, թե՞ դա ձգձգման մարտավարություն է։ Եթե խոսքը ձգձգման մարտավարության մասին է, ապա նախագահ Թրամփը չի ընկնի անվերջ բանակցությունների թակարդը»,- ասել է Ռուբիոն լրագրողներին Բրյուսելում ՆԱՏՕ-ի երկրների ԱԳ նախարարների նիստից հետո։
Ռուբիոն նաև նշել է, որ Ուկրաինան «ցուցադրել է լիարժեք հրադադարի հասնելու ցանկություն՝ բանակցությունների համար պայմաններ ստեղծելու նպատակով»:
«Ինչ-որ պահի, ոչ թե վեց ամսից, Ռուսաստանն ու Պուտինը պետք է որոշեն՝ արդյո՞ք լրջորեն են վերաբերվում խաղաղությանը։ Եթե նրանք տրամադրված են խաղաղության, հիանալի է, մենք կշարժվենք դեպի խաղաղություն, եթե ոչ, մենք պետք է վերագնահատենք մեր դիրքորոշումը և մեր գործողություններն ապագայում»,- նշել է Ռուբիոն։
ԱՄՆ պետքարտուղարը մեկնաբանել է նաև Կրեմլի հատուկ ներկայացուցիչ Կիրիլ Դմիտրիևի՝ վերջերս ԱՄՆ կատարած այցը և հաստատել, որ հանդիպել է նրան ամերիկացի այլ պաշտոնյաների հետ միասին։
Ռուբիոն, միաժամանակ, ասել է, որ ինքը ոչինչ չգիտի ԱՄՆ-ի և Ռուսաստանի միջև ուղիղ չվերթների վերականգնման մասին Դմիտրիևի հիշատակած բանակցությունների մասին։
Թարգմանությունը՝ Էմմա Չոբանյանի
