05.04.2026 | 19:49
Հույս ունեմ, որ այս գիշեր «Բուշեր» օդանավակայանից տարհանված աշխատակիցները կհասնեն Հայաստան․ «Ռոսատոմ»-ի ղեկավար
Հայաստանի պետական սիմֆոնիկ նվագախումբը ելույթներ կունենա Սաուդյան Արաբիայում, Օմանում և ԱՄԷ-ում
Մշակույթ
04.04.2025 | 13:31
Հայաստանի պետական սիմֆոնիկ նվագախումբը մշտական և սպասված հյուր է Մերձավոր Արևելքում։ Տարբեր երկրներում նվագախումբը պարբերաբար ներկայացնում է հայ կատարողական արվեստը և հանդես է գալիս համերգային յուրատեսակ ծրագրերով։ Այս անգամ նվագախումբը մեկնել է Սաուդյան Արաբիայի Դհահրան քաղաք․ տեղեկացնում են նվագախմբի լրատվական ծառայությունից։
Ithra թատրոնում Հայաստանի պետական սիմֆոնիկ նվագախումբը և Երևանի պետական կամերային երգչախումբն առաջին անգամ կներկայացնեն Game on համերգային ծրագիրը, որի ընթացքում կհնչեն համակարգչային հայտնի խաղերի համար գրված մեղեդիները՝ փոխադրված սիմֆոնիկ նվագախմբի և երգչախմբի համար։
Հայաստանի պետական սիմֆոնիկ նվագախմբի տնօրեն Սարգիս Բալբաբյանը նշում է, որ Game on-ը բավականին բարդ ծրագիր է նվագախմբի համար։ Համերգային երեկոն կզուգորդվի նորարարական լուծումներով, էկրանին ցուցադրվելիք պատկերներով։
Այնուհետև նվագախումբը կմեկնի Օմանի Սուլթանության մայրաքաղաք Մասկատ։ Մասկատի Արքայական օպերային թատրոնում նվագախումբն ապրիլի 10-ին և 11-ին հանդես կգա երկու համերգով՝ ներկայացնելով «Հարրի Փոթերը և փիլիսոփայական քարը» հանրահայտ ֆիլմի երաժշտությունը, որը հեղինակել է ամերիկացի հայտնի կոմպոզիտոր Ջոն Ուիլյամսը։ Այս համերգները նույնպես կուղեկցվեն տեսանյութերով։
Բոլոր համերգների տոմսերը վաղուց սպառվել են։
Ապրիլի 22-28-ն էլ Հայաստանի պետական սիմֆոնիկ նվագախումբն Արաբական Միացյալ Էմիրություններում ելույթ կունենա Classical Violin Olympus միջազգային մրցույթում։
