Բողոքի ակցիա Վրաստանում․ Զուրաբիշվիլին հայտարարել է «դիմադրության հարթակի» ստեղծման մասին

Վրաստանում լայնամասշտաբ բողոքի ցույց է տեղի ունեցել՝ նվիրված 1991 թվականին երկրի անկախության վերականգնման հանրաքվեի տարեդարձին։ Հանրահավաքն անցկացվել է «Ժողովրդական գարունն է գալիս» կարգախոսով։ Միջոցառման ժամանակ Վրաստանի հինգերորդ նախագահ Սալոմե Զուրաբիշվիլին հայտարարել է «դիմադրության հարթակի» ստեղծման մասին, գրում է Current time-ը։

Զուրաբիշվիլին, որը չի ճանաչում վերջին խորհրդարանական և նախագահական ընտրությունների արդյունքները, հայտարարել է, որ նոր խորհրդարանական ընտրություններ նշանակելու և «խղճի բանտարկյալներին» ազատ արձակելու համար, փողոցային ցույցերից բացի, անհրաժեշտ է նաև քաղաքական ձևաչափ, և առաջարկել է ստեղծել «դիմադրության հարթակ»։

«Այս հարթակի հիմնական սկզբունքն այն է, որ այն բաց է բոլոր եվրոպամետ կուսակցությունների և խմբերի համար, որոնք պատրաստ են մի կողմ թողնել քաղաքական տարաձայնությունները և աջակցել բողոքի երկու հիմնական պահանջներին՝ նշանակել նոր արդար ընտրություններ և ազատ արձակել խղճի բանտարկյալներին»,- ասել է Զուրաբիշվիլին։

Նրա ելույթի ժամանակ որոշ ցուցարարներ պահանջել են գնահատական ​​տալ նախկին իշխանությունների, այդ թվում՝ 2008 թվականի ռուս-վրացական պատերազմի ժամանակ գործունեությունը քննելու համար ստեղծված խորհրդարանական ժամանակավոր քննչական հանձնաժողովին։ Զուրաբիշվիլին հանձնաժողովի աշխատանքը անվանել է «զզվելի»՝ նշելով, որ այն ծառայում է ոչ թե պատմության ըմբռնմանը, այլ վրացական բանակի և հասարակության վրեժխնդրությանն ու բարոյալքմանը։

Վրաստանի երրորդ նախագահ Միխեիլ Սաակաշվիլիի կողմնակիցները ևս ներկայացել են խորհրդարանի մոտ անցկացվող հանրահավաքին՝ պահանջելով ազատ արձակել նրան և ձեռքներին համապատասխան պաստառներ են պահել։ Ցուցարարներից ոմանք սկսել են օգտագործել պիրոտեխնիկա, այդ թվում՝ հրավառություն արձակել խորհրդարանի շենքի ուղղությամբ։ Ուժայիններն առանց միջամտելու հանգիստ հետևել են տեղի ունեցող իրադարձություններին, չնայած հրավառությունն օրենքով արգելված է։

Թարգմանությունը՝ Էմմա Չոբանյանի