03.04.2025 | 18:25
Դատախազը դատարան է հանձնել խուլիգանական դրդումներով սպանություն կատարելու մեջ մեղադրվող 7 անձանց վերաբերյալ քրեական վարույթը
Սթարմերն ու Թրամփը պայմանավորվել են շարունակել ճնշումը Պուտինի վրա
Քաղաքականություն
31.03.2025 | 15:01
Լոնդոնը և Վաշինգտոնը միասնական են այն հարցում, որ հաշվի առնելով Ուկրաինայում շարունակվող պատերազմը՝ արևմտյան դաշնակիցները պետք է շարունակեն հավաքական ճնշումը Ռուսաստանի նախագահ Վլադիմիր Պուտինի վրա: Այս մասին հայտնել է Մեծ Բրիտանիայի կառավարությունը երկրի վարչապետ Քիր Սթարմերի և ԱՄՆ նախագահ Դոնալդ Թրամփի հեռախոսազրույցից հետո, գրում է DW-ի ռուսական ծառայությունը։
Նշվում է, որ Սթարմերը Թրամփին տեղեկացրել է վերջերս Փարիզում կայացած «կամավորների կոալիցիայի» հանդիպման ժամանակ «արդյունավետ քննարկումների» մասին, որում պետք է ներառվեն երկրներ, որոնք պատրաստ են հանդես գալ որպես Ուկրաինայի անվտանգության երաշխավոր։
Մարտի 27-ին Փարիզում տեղի էր ունեցել «կամավորների կոալիցիայի» գագաթնաժողովը, որին մասնակցել են 31 երկրների, ինչպես նաև ԵՄ-ի և ՆԱՏՕ-ի ներկայացուցիչներ։ Այս հանդիպման արդյունքում հայտարարություն էր տարածվել Կիևին ռազմական, ֆինանսական և էներգետիկ աջակցության ավելացման, ինչպես նաև Ուկրաինայի վերականգնմանն աջակցության մասին։ Գագաթնաժողովի մասնակիցները խոստացել են Ուկրաինային տրամադրել լրացուցիչ 17 միլիարդ եվրո ռազմական օգնություն, 2 միլիոն միավոր հրետանային զինամթերք և բարելավել համակարգումը ԵՄ անդամ երկրների միջև։
Ավելի վաղ լրատվամիջոցները հայտնել էին, որ բրիտանական բանակը քննադատում է Ուկրաինա խաղաղապահների ուղարկելու՝ Սթարմերի ծրագիրը։
Թարգմանությունը՝ Էմմա Չոբանյանի
