Քաղաքական թատրոն է․ բրիտանական բանակը քննադատում է Ուկրաինա խաղաղապահներ ուղարկելու՝ Սթարմերի ծրագիրը

Մեծ Բրիտանիայի վարչապետ Քիր Սթարմերի՝ Ուկրաինայում խաղաղությունը պահպանելու համար «կամավորների կոալիցիա» ստեղծելու ծրագրերը բրիտանացի զինվորականները մերժել են՝ դրանք «քաղաքական թատրոն» որակելով, գրում է The Telegraph-ը։

Մարտի սկզբին Սթարմերն առաջարկել էր խաղաղության նախաձեռնություն՝ պնդելով, որ մի քանի երկրներ պատրաստ են ապահովել ցանկացած խաղաղության համաձայնագրի պահպանումը: Սակայն կոնկրետ մանրամասներ այն մասին, թե ինչ զորք և տեխնիկա է ուղարկվելու, դեռևս չեն բացահայտվել:

Բարձրաստիճան զինվորական աղբյուրները, սակայն, հերքել են պլանները՝ The Telegraph-ին հայտնելով, որ Սթարմերն «առաջ է անցել»:

Աղբյուրներից մեկի համաձայն՝ Սթարմերի առաջարկները՝ ստեղծել «կամավորների կոալիցիա», որը կներառի այն երկրները, որոնք պատրաստ են հանդես գալ որպես Ուկրաինայի անվտանգության երաշխավորներ, «քաղաքական թատրոն» են։

«Սթարմերն առաջ է անցել՝ խոսելով ցամաքային զորքերի մասին՝ չիմանալով, թե ինչի մասին է խոսում, ուստի հիմա մենք ավելի քիչ ենք լսում այդ մասին, և ավելի շատ՝ օդանավերի ու նավերի մասին, որոնք ավելի հեշտ են իրագործվում և չեն պահանջում բազաներ ունենալ Ուկրաինայում»,- ասել է աղբյուրը։

Ըստ աղբյուրներից մեկի՝ ո՛չ Ռուսաստանը, ո՛չ ԱՄՆ-ը չեն աջակցում այդ նախաձեռնությանը, իսկ կոալիցիա ստեղծելու շուրջ բանակցությունները բարդանում են նրանով, որ «ոչ ոք չգիտի, թե որն է դրա առաքելությունը»։

«Ի՞նչ պետք է անի 10 հազարանոց միջազգային ուժը, որը տեղակայված է երկրի արևմուտքում՝ առաջնագծից ավելի քան 400 կիլոմետր հեռավորության վրա։ Այն չի էլ կարող իրեն պաշտպանել։ Ո՞րն է դրա առաքելությունը: Ո՞րն է դրա օրինականությունը: Որո՞նք են մարտական գործողությունների վարման  կանոնները: Ինչպե՞ս է այն կառավարվում, մատակարարվում և տեղակայվում: Որքա՞ն ժամանակ է այնտեղ լինելու և ինչո՞ւ: Ոչ ոք չգիտի»,- ասել է լրատվամիջոցի աղբյուրը։

Ռազմական բարձրաստիճան աղբյուրն էլ նշել է, որ թեև ինքը վստահ է՝ զինվորականները կարող են ինչ-որ բան պլանավորել, որպեսզի համապատասխանի Թրամփի հրադադարի՝ Զատկի վերջնաժամկետին, մնում է «քաղաքական և դիվանագիտական ​​հարց», թե որ ծրագիրն է իրականում իրագործվելու կամավորների կոալիցիայի կողմից: Նա նշել է, որ կոալիցիան ավելի շատ կենտրոնացած է «Ուկրաինայի անվտանգությանը շարունակական հավատարմության քաղաքական ազդանշանն ուժեղացնելու վրա», նաև հավելել, որ RAF-ի օդային ծածկույթի վերաբերյալ քննարկումները կոալիցիոն բանակցությունների «ամենաուժեղ» մասն են։

«Լավագույն բանը, որ մենք կարող ենք անել, դա ուկրաինացիներին զսպման և պաշտպանության միջոցներով զինելն է։ Դա պետք է լինի առաջին առաջնահերթությունը»,- նշել է աղբյուրը:

Թարգմանությունը՝ Էմմա Չոբանյանի