27.06.2026 | 09:03
ԱԱ-2026. Բելգիան ու Եգիպտոսը նվաճեցին փլեյ-օֆֆի ուղեգիր. ՏԵՍԱՆՅՈՒԹ
Տարոն Մարգարյանին մեղադրանք է ներկայացվել. ընտրվել է խափանման միջոց
Հասարակություն
28.03.2025 | 20:59
Առանձնապես խոշոր չափերի փողերի լվացման, պաշտոնեական լիազորությունների չարաշահման և պետական կամ համայնքային սեփականություն հանդիսացող հողամասերի ինքնակամ զավթման հոդվածների հատկանիշներով ՀՀ ԱԺ «Պատիվ ունեմ» խմբակցության պատգամավոր Տարոն Մարգարյանին մեղադրանք է առաջադրվել։ Այս մասին FactorTV-ի հարցմանն ի պատասխան տեղեկացրեց Գլխավոր դատախազի խորհրդական Լուսինե Մարտիրոսյանը.
«Հսկող դատախազի կողմից հանրային քրեական հետապնդում հարուցելու որոշում է կայացվել, խափանման միջոց է ընտրվել բացակայելու արգելքը»,- նշեց Մարտիրոսյանը։
Հիշեցնենք՝ Գլխավոր դատախազ Աննա Վարդապետյանն Ազգային ժողով է ներկայացրել Տարոն Մարգարյանին անձեռնմխելիությունից զրկելու և նրա նկատմամբ քրեական հետապնդում հարուցելուն համաձայնություն տալու մասին միջնորդագիրը, որը 67 կողմ 0 դեմ ձայներով բավարարվեց։
Ըստ մեղադրանքի՝ Տարոն Մարգարյանը քաղաքապետ աշխատած տարիներին հանցավոր ճանապարհով օրինականացրել է դպրոցական և նախադպրոցական հաստատություններից մոտ 7000 քառակուսի մետր հողատարածք:
Ավելի վաղ մեղադրանք էր ներկայացվել նաև ՔՊ-ական նախկին պատգամավոր Հովիկ Աղազարյանին։ Նա մեղադրվում է առանձնապես խոշոր չափով կաշառքի և պաշտոնատար անձի նկատմամբ ունեցած իրական կամ ենթադրյալ ազդեցությունն օգտագործելու հոդվածներով։ Նա ևս երեկ ԱԺ-ում զրկվեց անձեռնմխելիությունից։
Ռոզա Վարդանյան
