08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
25% մաքսատուրք ԱՄՆ ավտոմեքենաների ներկրման համար․ ԵՄ-ն քննադատում է, Գերմանիան՝ վճռական արձագանքի կոչ անում
Քաղաքականություն
27.03.2025 | 13:13
Գերմանացի քաղաքական գործիչները Եվրամիությանը կոչ են անում վճռականորեն արձագանքել ԱՄՆ նախագահ Դոնալդ Թրամփի կողմից սահմանված ավտոմեքենաների ներկրման 25 տոկոս մաքսատուրքերին, գրում է DW-ի ռուսական ծառայությունը։
«Պատասխանը կարող է լինել միայն եվրոպական մակարդակով, քանի որ արտաքին առևտուրը ԵՄ պարտականություններին է առնչվում»,- ասել է Քրիստոնեա-դեմոկրատական միության արտաքին քաղաքականության հարցերով փորձագետ Արմին Լաշեթը։
Նա նշել է, որ պետք է երկկողմանի մոտեցում ցուցաբերել, ինչպես Թրամփի առաջին պաշտոնավարման ժամանակ՝ սպառնալով պատասխան մաքսատուրքերով, որոնք կաշխատեն, նաև առաջարկել բանակցություններ: Ըստ նրա՝ Վաշինգտոնի գործողություններին պետք է պատասխանել «ամբողջ ուժով»։
Մեկ այլ փորձագետ Նորբերտ Ռյոթգենը կոչ է արել հանգիստ արձագանքել համաեվրոպական մակարդակով։
«Կարևոր է վճռականությունը»,- ընդգծել է նա՝ կարևորելով ԵՄ-ի պատրաստակամությունը։
Ռյոտգենի կարծիքով՝ արձագանքման քայլերը պետք է լինեն «նպատակային ու չափավոր՝ ցույց տալով, որ մենք էլ ունեն գործիքներ, բայց չնպաստելով էսկալացիային»։ Նա նաև ասել է, որ Թրամփը, հայտարարելով մաքսատուրքերի մասին, փորձում է հասարակության ուշադրությունը շեղել սկանդալից՝ կապված լրագրողի ավելացմանը գաղտնի չաթում, որտեղ քննարկվել են Եմենի հութիների վրա ԱՄՆ-ի հարվածները:
Եվրահանձնաժողովի նախագահ Ուրսուլա ֆոն դեր Լեյենը նույնպես քննադատել է մաքսատուրքերը՝ խորը ափսոսանք հայտնելով Վաշինգտոնի որոշման համար։
«Սակագները վատ են անդրադառնում բիզնեսի վրա ավելի վատ հետևանքներ ունեն սպառողների համար ԱՄՆ-ում և ԵՄ-ում»,- նշել է նա՝ ասելով, որ Բրյուսելը կշարունակի բանակցությունների միջոցով լուծումներ փնտրել, միաժամանակ, կպաշտպանի սեփական տնտեսական շահերը։
Գերմանական ավտոմոբիլային արդյունաբերության ասոցիացիան (VDA) ապագա սակագները դիտարկում է որպես «ճակատագրական ազդանշան ազատ և կանոնների վրա հիմնված առևտրի համար»: Սակագները նշանակում են «զգալի բեռ ինչպես ընկերությունների, այնպես էլ ավտոմոբիլային արդյունաբերության հետ սերտորեն կապված համաշխարհային մատակարարման շղթաների վրա», ասել է VDA-ի նախագահ Հիլդ Մյուլերը: Ըստ նրա՝ բացասական հետևանքները կզգան, առաջին հերթին, սպառողները, այդ թվում՝ Հյուսիսային Ամերիկայում։
Միավորումը կոչ է արել անհապաղ ԱՄՆ-ԵՄ բանակցություններ սկսել երկկողմ համաձայնագրի շուրջ: Նման երկխոսությունը հարթակ կստեղծի ավտոմոբիլային ապրանքների համար տարբեր սակագնային և ոչ սակագնային խոչընդոտների քննարկման նպատակով և կարող է հանգեցնել ավելի հավասարակշռված մոտեցման։
Հավելենք, որ մարտի 26-ի երեկոյան ԱՄՆ նախագահ Դոնալդ Թրամփը հայտարարել էր, որ ապրիլի 2-ից 25 տոկոս մաքսատուրք կգործի ավտոմեքենաների ներմուծման համար։ Մաքսատուրքերը չեն ազդի ԱՄՆ-ում հավաքվող մեքենաների վրա։ Սպիտակ տուն վերադառնալուց ի վեր Թրամփը սահմանել կամ սպառնացել է մաքսատուրքեր սահմանել ԱՄՆ ներմուծվող մի շարք ապրանքների վրա, այդ թվում՝ Եվրամիությունից ներկրվող։
Թարգմանությունը՝ Էմմա Չոբանյանի
