08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
ԱՄՆ Ներկայացուցիչների պալատի դեմոկրատների առաջնորդը Թրամփին կոչ է արել պաշտոնանկ անել Պենտագոնի ղեկավարին
Քաղաքականություն
26.03.2025 | 15:32
ԱՄՆ Կոնգրեսի Ներկայացուցիչների պալատի դեմոկրատական փոքրամասնության առաջնորդ Հաքիմ Ջեֆրիսը կոչ է արել պաշտոնանկ անել պաշտպանության նախարար Փիթ Հեգսեթին՝ պատերազմի պլանները Signal-ի չաթում քննարկելու համար, գրում է Politico-ն։
«Նրա վարքագիծը վտանգում է ամերիկացիների կյանքը և, հավանաբար, խախտում է օրենքը։ Պաշտպանության նախարար Փիթ Հեգսեթը պետք է անհապաղ պաշտոնանկ արվի»,- նախագահ Դոնալդ Թրամփին ուղղված նամակում նշել է Ջեֆրիսը։
Նրա նամակը հետևում է այլ դեմոկրատների՝ գաղտնի տեղեկատվության արտահոսքի մասնակից դարձած պաշտոնյաներին պաշտոնանկ անելու կոչերին։ Սենատի հետախուզության հանձնաժողովի դեմոկրատ սենատոր Մարկ Ուորներն ասել էր, որ և՛ Հեգսեթը, և՛ ազգային անվտանգության հարցերով խորհրդական Մայքլ Ուոլցը պետք է հրաժարական տան: Սակայն Ներկայացուցիչների պալատի առաջատար հանրապետականները, ինչպիսին է խոսնակ Մայք Ջոնսոնը, կանգնած են Հեգսեթի, Թրամփի և մյուս պաշտոնյաների կողքին։ Ջոնսոնը լրագրողներին ասել է՝ դա «սխալ» է, որը չի կրկնվի։
Նախօրեին ԱՄՆ մի քանի հետախուզական գործակալությունների ղեկավարներ, այդ թվում՝ Ազգային հետախուզության տնօրեն Թուլսի Գաբարդը և ԿՀՎ տնօրեն Ջոն Ռեթքլիֆը, մասնակցել են Սենատում Վերին պալատի համապատասխան հանձնաժողովի լսումներին։ Երկուսն էլ չեն հերքել նամակագրության հրապարակված հատվածները, սակայն հետևողականորեն և կտրականապես հերքել են, որ զրույցի ընթացքում որևէ գաղտնի տեղեկատվություն է բացահայտվել կամ նույնիսկ քննարկվել։
Հիշեցնենք, որ The Atlantic-ի գլխավոր խմբագիր Ջեֆրի Գոլդբերգը պատահաբար ներառվել էր Signal մեսենջերի գաղտնի խմբային չաթում, որտեղ ԱՄՆ Ազգային անվտանգության խորհրդի բարձրաստիճան անդամները քննարկել են Եմենի հութիների դեմ ծրագրվող ռազմական գործողության մանրամասները: Այն քաղաքական մեծ սկանդաի պատճառ է դարձել ԱՄՆ-ում։
Թարգմանությունը՝ Էմմա Չոբանյանի
