Քաղաքականություն
25.03.2025 | 17:08
Սաուդյան Արաբիայում ԱՄՆ-ի հետ բանակցությունների ընթացքում քննարկվել են Սև ծովում անվտանգ նավագնացության հարցեր։ Այս մասին ռուսական Առաջին ալիքին տված հարցազրույցում հայտնել է ՌԴ արտգործնախարար Սերգեյ Լավրովը։
Նրա խոսքով՝ Ռուսաստանը կողմ է Սևծովյան նախաձեռնությունը «բոլորի համար ավելի ընդունելի ձևով» վերսկսելուն։ Լավրովը նաև ասել է, որ համաձայնագիրը վերսկսելիս Ռուսաստանին հստակ երաշխիքներ են պետք։
Ռուսաստանցի պաշտոնյան նշել է՝ Վաշինգտոնից Կիևին ուղիղ հրահանգը Մոսկվայի համար Սևծովյան նախաձեռնության անվտանգության հստակ երաշխիք կլինի, և ռուսական կողմը կարծում է, որ այդ ազդանշանն ընկալվել է ամերիկացիների կողմից։
«Մեզ հստակ երաշխիքներ են պետք, և երաշխիքներ կարող են լինել՝ հաշվի առնելով Կիևի հետ պայմանագրերի տխուր փորձը։։ Երաշխիքները կարող են լինել միայն Վաշինգտոնից Զելենսկիին և նրա թիմին տրված հրահանգի արդյունքում, և ոչ այլ կերպ: Ես կարծում եմ՝ ամերիկացի գործընկերները մեր այդ ազդանշանն ընկալել են։ Նրանք հասկանում են, որ միայն Վաշինգտոնը կարող է հասնել դրական արդյունքների, ահաբեկչական հարձակումները դադարեցնելու, քաղաքացիական ենթակառուցվածքների, ռազմարդյունաբերական համալիրի հետ չառնչվող էներգետիկ ենթակառուցվածքների հրետակոծությունների դադարեցմանը»,- ասել է Լավրովը։
Նա հավելել է՝ ցանկանում են, որ հացահատիկի շուկան, պարարտանյութի շուկան լինի կանխատեսելի, որպեսզի «ոչ ոք չփորձի մեզ հեռացնել այս շուկայից»։
Ըստ Լավրովի՝ ԱՄՆ-ի և Ռուսաստանի նախագահներն այժմ տեղեկացվում են բանակցությունների արդյունքների մասին։
Թարգմանությունը՝ Էմմա Չոբանյանի
