Բաքվին մտահոգել է հայ գերիների ազատ արձակման հարցով Մեծ Բրիտանիայի վարչապետին ուղղված Հայոց թեմի առաջնորդի նամակը

Մեծ Բրիտանիայի հայոց թեմի առաջնորդի՝ հայ գերիների ազատ արձակման հարցով թագավորության վարչապետ Քիր Աթարմերին ուղղված նամակն անհանգստացրել է Բաքվին։ Ըստ ադրբեջանական լրատվամիջոցների՝ Ադրբեջանի կրոնական դավանանքների առաջնորդները դիմում են հղել Մեծ Բրիտանիայի վարչապետին՝ մտահոգություն հայտնելով Լոնդոնի հայոց թեմի առաջնորդ Հովակիմ եպիսկոպոս Մանուկյանի և բրիտանացի մի շարք կրոնական գործիչների կողմից նրան ուղղված նամակի բովանդակության վերաբերյալ։

Ադրբեջանի հոգևոր առաջնորդներն ընդգծել են, թե, իբր, «Մանուկյանի նամակն ապատեղեկատվություն է պարունակում և կարող է վտանգի տակ դնել Ադրբեջանի և Հայաստանի միջև խաղաղության  գործընթացը»։ Նշվում է, թե, իբր, «Ադրբեջանում կրոնի ազատությունն ապահովված է, և տարբեր կրոնական համայնքներ ավանդաբար ներդաշնակ ապրում են»։

Դիմումի մեջ երախտագիտություն է արտահայտվում Մեծ Բրիտանիային՝ հավասարակշռված դիրքորոշման համար և վստահություն, որ Լոնդոնը կշարունակի աջակցել տարածաշրջանում խաղաղության գործընթացին և «արդարության վերականգնմանն ուղղված Ադրբեջանի ջանքերին»։

Փաստաթուղթը ստորագրել են Կովկասի մահմեդականների վարչության նախագահ Ալլահշուքյուր Փաշազադեն և Ադրբեջանի հրեական ու քրիստոնյա համայնքների ներկայացուցիչները։

Հիշեցնենք, որ ավելի վաղ Մեծ Բրիտանիայի և Իռլանդիայի հայոց թեմի առաջնորդ Գերաշնորհ Հովակիմ եպիսկոպոս Մանուկյանը նամակ էր հղել Մեծ Բրիտանիայի վարչապետ Քիր Սթարմերին։ Նամակին միացել էին նաև ութ այլ եկեղեցական առաջնորդներ, ովքեր վարչապետին կոչ էին արել ճնշում գործադրել Ադրբեջանի վրա՝ շինծու մեղադրանքներով բանտարկված հայ գերիներին ազատ արձակելու համար։

Թարգմանությունը՝ Էմմա Չոբանյանի