17.07.2026 | 17:43
Հունիսին ՔԿՀ-ներում հայտնաբերվել է 137 բջջային հեռախոս և թմրամիջոցների նմանվող նյութեր
Լուկաշենկոն 7-րդ ժամկետով պաշտոնապես ստանձնել է Բելառուսի նախագահի պաշտոնը
Քաղաքականություն
25.03.2025 | 14:44
Ալեքսանդր Լուկաշենկոն պաշտոնապես ստանձնել է Բելառուսի նախագահի պաշտոնը՝ յոթերորդ ժամկետով։ Երդմնակալության արարողությունը տեղի է ունեցել մարտի 25-ին Մինսկի Անկախության պալատի հանդիսությունների սրահում։
Երդումից հետո Լուկաշենկոյին պաշտոնապես հանձնվել է երկրի նախագահի վկայականը։ Նա հայտարարել է, թե Բելառուսն ընտրել է անկախությունն ու վստահ ապագան։
«Ինչպես սկզբում՝ մենք կրկին մեծամասնությամբ ընտրեցինք մեր անկախությունը, քաղաքական կուրսի շարունակականությունը և վստահ ապագան, ցույց տվեցինք բելառուս ազգի հասունությունը, մեր միասնության հաղթանակը։ Մենք ցույց տվեցինք ընտրական ինքնիշխանությունը գործողության մեջ»,- հայտարարել է Լուկաշենկոն։
Նշվում է, որ արարողությանը հրավիրված են եղել ավելի քան 1100 հյուրեր։ Նախօրեին նաև տեղեկություններ էին տարածվել, որ Լուկաշենկոյի երդմնակալության օրն արտասահմանից օգտատերերի համար սահմանափակվելու է մուտքը բելառուսական կայքեր։
Հավելենք, որ հունվարի 27-ին Բելառուսի Կենտրոնական ընտրական հանձնաժողովը հայտարարել էր նախագահական ընտրություններում Լուկաշենկոյի հաղթանակի մասին՝ ձայների 86,82% տոկոսով։ Ընտրություններում «հաղթանակի կապակցությամբ» նրան շնորհավորել են ընդամենը մի շարք երկրների ղեկավարներ, այդ թվում՝ ՌԴ նախագահ Վլադիմիր Պուտինն ու Ադրբեջանի նախագահ Իլհամ Ալիևը։
Հայաստանից նրան շնորհավորական նամակ չի հղվել։
Լուկաշենկոն երկրի նախագահի պաշտոնը զբաղեցնում է 1994 թվականից։ Եվրախորհրդարանը, ԵՄ-ն ու Արևմուտքը չեն ճանաչում Բելառուսի ընտրությունները 2020 թվականի բողոքի ցույցերից հետո, որոնք սկսվել էին նախագահական ընտրությունների արդյունքների կեղծման, ցուցարարների և ընդդիմության ներկայացուցիչների նկատմամբ բռնաճնշումների պատճառով։
Թարգմանությունը՝ Էմմա Չոբանյանի
